SHILLONG:
Ka jingïakhun kaba tyngeh na bynta ka shuki MLA ha Sohïong ha ka 13 tarik Jymmang ka la poi sha kaba kut ha kaba u Bah Synshar Lyngdoh Thabah na ka seng United Democratic Party (UDP) u la ïoh ïaka jingjop ha kane ka elekshon ba marwei jong ka Sohïong Konstitwensi.
Ka elekshon shiteng samoi ha Sohïong Konstitwensi ka la pyn lyngnga mynsiem ym tang ïa ki paidbah hynrei wat ïa ki seng saiñ pyrthei namar la khmih lynti ba kane ka elekshon kan wanrah ka jingkylla ha ka saiñ pyrthei jong ka jylla baroh kawei.
Ha kane ka sngi, hadien ba la dep ban ñiew pura ïa ki votes ha Sohïong, u Bah Synshar Lyngdoh Thabah u la ïoh ïa ka jingjop ha kaba u la pynrem 3422 vote ïa u MLA barim ka Sohïong Konstituensi u Bah Samlin Malniang.
Baroh kyllum u Bah Synshar Lyngdoh Thabah u la ïoh 16679 votes katba u Bah Samlin Malngiang u la ïoh 13257.
Hapdeng ka jingkmen bad risa ki nongkyrshan ka seng UDP katba ki dang rwai bad pyrta ïa ka sur jingjop jong u kyrtong jong ki, ka la mih kynsan ka sur ba pyrta “Ha u prah” tang kum ban pynsngew ïa ki nongkyrshan ka UDP.
Ki durkhmat ba lyngnga kiba dang ap shabar ka jaka ñiew vote ha State Central Library ryngkat kiwei ki nongkyrshan ki bym salia ban shah ïa ka jingshoh ka sngi ki ïeng laiñ ha shi lynter ka IGP.
Katba ka jingñiew vote ka la poi artad sha kaba kut, ki paidbah nongkyrshan da ka jingkmen kila phone briew ban pyntip ba la jop ka UDP. La ïohsngew ruh ïa ka jingong jong ki nongkyrshan ba ki ong “La jop suk”.
Ha kane ka sngi, ym shym la ïohi ïa ka jingdon ki kali jong kiwei pat ki seng ba la ïakhun ha kane ka elekshon lait noh tang jong ka NPP.
