SHILLONG:
U MDC ka Mylliem u Bah Ronnie V Lyngdoh u la ong ba ha ka Mylliem konstitwensi ki paidbah kim dei kiba beij, ban shah pynbiej.
Haba kren sha ki lad pathai khubor, u Bah Ronnie uban ïakhun ïa ka MLA elekshon 2023 na Congress, u la ong, “hato ki paidbah ki donkam ka jingïarap tang ha ka por elekshon, shano kita ki skhim FOCUS ki jah baroh 5 snem, u paidbah u thngan tang san snem, u paidbah u donkam tapmoh khlieh lane kita ki sniang ki syiar tang mynta la jan elekshon. Lada kane ka sorkar ka ai mar sien jop nga ngeit ba kito kiba ïoh 2 tylli lane 4 tylli ki sniang nga ngeit ki la roi haduh 10-15 tylli”.
U la ong ba la jied ïa kine kiba ïoh jingmyntoi ruh tang ka sem syiar ruh kim don bad kane ka long tang ka jingpynlut phut ïa ka pisa paidbah ban pynjop elekshon. “Lada ki don shisha ka jingthmu mar sien jop hadien shi snem ba la dep ban mang lyngba ka Dorbar Tyngka sam noh bad 10 snem ki paidbah ki la kiew”.
Haba kylli halor ka jingduna kane ka thaiñ, u Bah Ronnie u la ong, “Ka Mylliem ka donkam bun khamtam ki lynti synkien, umbam umdih, Tele-communication, ka bording ka bym don jingthut, jaka sumar, jaka pule bad kiwei kiwei ki jingdonkam ha kane ka thaiñ bad ka jylla hi baroh kawei”.
Haba kylli halor ka bor pisa ka treikam bha ha ka por elekshon, u Bah Ronnie u la ong, “Ki paidbah kidei ban pyrkhat bha bad hato kita ki pisa ba sam ki lah mo ban weng ïa ka jingeh. Lada phi sam baroh san snem te ka biang keiñ, sam mynta shwa elekshon te lada ki paidbah ki beij ki shet kylla ïa ka dor lajong”.
U Bah Ronnie u la ong ba kane ka sorkar MDA ka pynbeij da kaba ong ba kan thaw ki kolej, ki opihs treikam bapher bapher kumne kumtai hynrei ka lah mo ban pybndep tang hapoh 1-2 bnai ïa kita. U la ong ba kum ki paidbah kidei ban sngewthuh bha kaei ba ki ïoh na kane ka sorkar bamsap.
