SHILLONG:
Ka jingïakynthah bad ïa kawang ktieh hapdeng u Dr. Mukul Sangma bad u Conrad Sangma, la iohi ba ka la kylla long shi bynta ka jingïalap elekshon jong ki mynta u snem 2023, ha kaba uwei u kdew kti ïa uwei pat halor ki jingtlot bad jingduna ha ka rukom treikam jong ki. U Dr. Mukul u la ther ïa kane ka sorkar ba mynta hapoh ka jingïalam jong u Conrad bad u Conrad ruh kumjuh u la kynthoh ïa u Dr. Mukul uba la ju long teng u Myntri Rangbah jong ka jylli la ar sien, kata ha u snem 2010 haduh 2013 bad 2013 haduh 2018 ha ka por ba u dang don bad ka Congress.
Kum shi bynta jong ka jingïalap elekshon, u nongïalam jong ka Trinamool Congress (TMC), u Dr. Mukul Sangma u la pynlong bun tylli ki jingïalang ha ka 13 tarik Rymphang kynthup ha Dalu bad Rangsakona ha West Garo Hills.
Sa shisien pat u Dr. Mukul haba ai jingkren ha Dalu, u la wohdong ïa ka sorkar MDA ba la ïalam da ka NPP halor ka jingthok jong ka ïa ki jingplie ïa kiba bun ki projek bad buh jingkylli, “Ki la kam ba ki la ai ïa ka civil subdivision, hynrei nga kwah ban kylli, hato la shu leh kyrkieh ïa kiei kiei bnaroh tang ban pyni ba la plie? Hato kim shym la airong ïa ka jingtei ar sngi shwa ban pynïeng ïa ka?”
U Dr. Mukul u la kynnoh ruh ba kane ka sorkar ka la shu shimwai ïa ki tiar, ha kaba tang hadien khyndiat sngi hadien ba lah dep plie, baroh kine ki tiar la wan shim noh bad ymdon ei ei shuh mynta. “Ïano ki thok?” la buh dak jingkylli u Dr. Mukul.
Ha kawei pat ka jingïalang hapoh Rangsakona, la don ryngkat lang bad u Dr. Mukul da u MLA ba mynta kane ka konstitwensi, u Zenith Sangma ryngkat bad kiwei pat ki nongïalam. Ha kane ka jingïalang ruh u Dr. Mukul u la khyrwit biang ïa ka jingbymseisoh ka jingtreikam ka NPP bad ka jingbymlah jong ka ban pynurlong ïa ki kular ba ka la khlei. U Dr. Mukul u la buh jingkylli ïa ka NPP halor ka jingpulom ha ka liang ka pule puthi ha ka jylla. “Hato kim shym la kular ha ka elekshon ba lahdep ba ka pule puthi ka dei kaba hakhmat eh? Te balei ba ki leh bym kheiñ snep ïa ki nonghikai? Watla ki la ong ba ka pule puthi ka dei ka kam kaba ha khmat eh jong ki, dei ma ki kiba la khang noh ïa ki Architecture and Engineering college khlem da pyndep”.
U Dr. Mukul u la kynnoh ruh ba dei kane ka sorkar hapoh ka jingïalam ka NPP kaba la khang ïa ki skul khlem da thung nonghikai thymmai hadien ba ki nonghikai ka primary school ki la shongthait noh. “Hato kane ka dei ka kam ba nyngkong eh jong ki na ka bynta ka pule puthi?” la buh dak jingkylli u Dr. Mukul bad bynrap ruh da kaba ong ba ki don da ki spah tylli ki primary school kiba la khang khyrdep hapoh South Garo Hills, East Garo Hills, West Khasi Hills bad South-West Garo Hills.
U Dr. Mukul u la kynnoh ruh ba ka Congress ka ïadon bynta lang bad ka BJP bad NPP da kaba ong, “Ka INC ka dei ka bynta jong ka BJP, bad ki ai tiket tang hadien ba lah dep ïasyllok bad ka BJP bad NPP”.
