SHILLONG:
Hadien ba ar ngut ki MLA ka HSPDP ki leit ban kyrshan ia ka NPP ban thaw ia ka sorkar, mynta sa ka UDP bad PDF ki la leit tyrwa sngewbha noh ban ïathaw ïa ka sorkar bad ka NPP, BJP.
Ha ka jingshisha, ka kynhun ki sengbhalang ha ka 4 tarik Lber kila byrthen ba ki 2 ngut ki MLA ka HSPDP ki dei ban wan phai biang sha ka sem jong ki seng riewlum ba kin ïoh ban ïalam ïa ka sorkar hynrei kane ka jingleit kyrshan ka UDP bad ka PDF ka la pynpulom noh khaid ïa kane ka jingthmu.
Ha ka jingïalang ha Motphran ha ka 4 tarik Lber, ki paidbah kila byrthen ban leit tur sha ïing sah jong ar ngut ki MLA ka HSPDP u Bah Shakliar Warjri na Mawthadraishan bad u Bah Methodius DKhar na Mawshynrut ba kin leit phai sha ka kynhun ban ïalam sorkar ki seng riewlum bad lada ki pyneh, kin leit tur syndon sha Raj Bhavan ha ka 7 tarik kaba la buh ban pynbam smai ïa u Conrad K Sangma kum u Myntri Rangbah.
Ka jingïalang ka la thrang tyngeh ba ka la dei ka por ban ïoh Myntri Rangbah u Khasi hadien 15 snem ba la ïalam na Garo Hills. Kila kyntu ïa ki seng riewlum naduh ka UDP, VPP, PDF bad HSPDP kin ïatylli ban ïoh ïa u Myntri Rangbah Khasi lyngba ka jingkyrshan lang ka TMC bad ka INC.
Lah ban kdew ba ka jingthmu jong ki seng riewlum hapoh ka jingïalam ka UDP kaba jop 11 ngut, VPP 4, PDF 2, ka la pulom noh hadien ba 2 ngut ki MLA ka HSPDP ki la phet sha ka sem ka NPP. Ka NPP ka don ka BJP 2, MLA shimet 2 ngut, bad HSPDP 2 ngut, kan kot sha ka 32 ngut katba ka kynhun ki seng riewlum kaba kynthup ïa ka UDP 11, VPP 4, PDF 2, TMC 5, INC 5 ka don 28 ngut bad ka donkam sa ar ngut ban ïoh ïa ka jingbun paid.
Da kane ka jingleit kyrshan ka UDP bad PDF, ka kynhun ka NPP ka la kiew sha ka 45 ngut ki MLA ha ka ïing dorbar kaba 59 ngut.
