NONGSTOIÑ:
U Bah Brolding Nongsiej u ba dei u MLA bad Minister sorkar barim na ka Mawthadraishan konstitwensi ha ka 31 tarik Kyllalyngkot u la hiar sha ka shnong Mawlangkhar ban ïalap elekshon na ka bynta u kyrtong ka United Democratic Party (UDP) Nongstoiñ u Bah Polestar Nongsiej ha ka jingïalang kaba la long hapoh ka shnong Mawlangkhar WKHD.
Ha kane ka jingïalang ïalap elekshon ka UDP na ka bynta ki 6 tylli ki polling station ka thaiñ Mawlangkhar la sakhi ruh da ki spah ngut ki paidbah nongshong shnong na kitei ki 6 polling kila wan ban sngap ïa kaei kaba ki nongkren bad u kyrtong ki wan ban khlei ïa ki jubanlak sha u paidbah na ka bynta kane ka elekshon MLA.
U Bah Brol haba ai jingkren ha katei ka jingïalang u la ong ba ka UDP kadei ka Seng riewlum kaba heh tam ban ïa kiwei ki seng ha ka jingdon MLA bad mynta ka kynti ka UDP kala lah ban sei haduh 45 ngut ki kyrtong ki ban sa ïa ai reng ha kane ka elekshon MLA.
U la ong ruh ba ka Seng UDP kan sa ïoh ban ïalam ïa ka sorkar ha kane ka elekshon kaba mynta kumta ki paidbah kidei ban phai khmat noh sha ka UDP khnang ba yn lah ban sei noh ïa u Myntri Rangbah u ba dei u Khasi bad na ka UDP.
“Lada ngi ailad biang ïa ka NPP ban synshar ngi ki Khasi bad Jaiñtia ngin sa long kum ki skeleton namar 8 snem la bat da ka Congress bad 5 snem da ka NPP bad shano kin ïalam ïa ka Jylla jong ngi.”
Ha kane ka jingïalang la ïadon ryngkat lang ruh u kyrtong ka UDP na Nongstoin u Bah Polestar Nongsiej, u Bah L.G Nongsiej MDC barim ka Nongstoiñ bad kiwei kiwei kiba la ai jingkren ban pynshai ïa ki nongrim ka UDP sha ki paidbah.
