SHILLONG:
U Myntri Rangbah ka jylla u Conrad Sangma ula ong ba kum u nongïalam u long uba skhem bad u kut jingmut na ka bynta ka konstitwensi lajong bad u long ruh u briew uba ïaineh shi jaka khlem da kynthih na kawei ka konstitwensi sha kawei pat.
U la bynrap ruh da kaba ong, ” Da kaba leh kumne kan long ka nuksa ïa kiwei, ba kam long kaba bha ban kynthih seng shane shatai hynrei ban long kiba kut jingmut na ka bynta ka konstitwensi lajong.”
U la ong ruh ba naka bynta ka bha ka miat jong ka South Tura konstitwensi ula ïaleh shitom ha ki san snem ba la leit ban wanrah ïa ka jingkylla bad lyngba kane u ngeit skhem ba ki briew jong ka South Tura sa shisien kin kyrshan biang ïa u, kumba ki la leh ha ki snem ba la leit.
Na ka liang jong u Conrad Sangma haba jubab ïa ka jingkylli halor ka jingkynthih u Dr Mukul Sangma na kawei ka konstitwensi sha kawei pat ula ong ba kane ka shong ha ka mon jong u Dr Mukul lada um kynmaw ïa kaei kaba ki konstitwensi kiba u don mynshuwa ki pynlong ïa u bad ka jingïakhun na ki ar tylli ki konstitwensi kan long pynban ka jingma ïa u hi shimet.
Na ka liang u Myntri Rangbah u Conrad Sangma haba jubab halor ka jingjied ïa u Myntri Rangbah ka jylla ula ong ka jingjied ïa U Myntri Rangbah hadien ka ilekhson kam dei ban long na ka jaidbynriew namar ïa kane la ailad ha ki MLA ba kin jied ïano ki mon ban pynlong u Myntri Rangbah jong ka jylla.
Shuh shuh ha kane ka sngi u Conrad Sangma u la batai khyndiat shaphang ka kot kaba ka seng ka la pyllait mynta ka sngi kaba ïadei bad ki jingjop bad ki jingkular kiba ka seng kala dep pynurlong. na ka liang jong u Sangma ula ong ba hapoh kane ka kot ki paidbah kin lah ban ïohi ïa kiei kiei kiba ka seng kala kular ha u snem 2018 ban pyndep kiba kynthup naduh kaba wanrah ïa ka roi ka par, ka jingïapynbeit ïa u pud u sam, ka jingpynïasoh ïa ki surok bad kiwei kiwei ha kaba ka sorkar ka la dep leh lut katkum ba la kular ha ki 5 snem ba la dep bad halor jong kine la ïoh ruh ïa shibun ki jingjop.
U la ong ruh ba dang don kiba hap ban leh ban pyndep hynrei da bishar mynta pat ka long shisha kaei kaei kaba lah ban ong ba kane ka sorkar ka la trei bha.
Haba kylli pat halor ka jingbym pat lah ka seng ban pynbna ïa ki kyrtong jong ka Mairang bad ka South Shillong na ka liang u Conrad ula ong ba kumba ka long ka seng kala peit bniah ïa ki briew hynrei kam pat hun, kumta ïa kane ka kam ym pat lah ban pyndep.
