MAIRANG:
Ka Ophis jong u Deputy Commissioner Eastern West Khasi Hills District katkum ka Prokram ba la pynlong da ka Systematic Voters’ Education and Electoral Participation (SVEEP), la pynshai sha ki paidbah nongthep vote jong ka Mairang bad ka Mawthadraishan Konstitwensi ba kin ïamih paidbah ryntih lang ban leit thep ïa ki vote ki jong ki ha ka 27 tarik u bnai Rymphang 2023 ban pyndep ïa la ki kamram kum ki nongshong shnong jong ka Ri India kiba la biang ka arta bad kiba la bit ban jied ïa ki nongmihkhmat sha ka ïing dorbar thaw aiñ ka jylla.
Ha ka jingkren u Deputy Commissioner u Bah Wilfred Nongsiej ula ong ba ka Election Commission of India ka la thaw lad thaw lynti lyngba ka SVEEP da ki kam pynshai sha ki paidbah bad ka ban jur ruh ha ar tylli ki phang kiba kongsan kata ban Register kyrteng bad halor ka kamram jong ki nongthep vote ba ka dei ka hok jong ki nongshong shnong ba ki don bor ban jied ïa ki nongmihkhmat ban wanrah ka jingkylla ha ka Konstitwensi bad ban da bishar bniah ruh napdeng kino ki kyrtong kiba ibit ban shah jied.
U DC ula kyntu ruh ïa ki paidbah nongthep vote ba kin ym dei ban shaniah ha ki jingshah pynbiej na ki jingai sngewbha ne na ka jingshah tyrwa ne ki kular bad ruh na ka jingshah pynbor hynrei ki dei ban jied ïa u nongmihkhmat da ka mon laitluid khlem da shah teh shah khum hynrei ban jied da ka mon ba laitluid.
