SHILLONG:
Hashwa ba ki MLA ka HSPDP kin shet kylla ïa ka rai ki seng riewlum ban thaw da ka sorkar kaba khlem NPP bad BJP, u president Meghalaya Pradesh Congress Committee (MPCC) bad ruh uba dei u MP ka Lok Sabha, u Bah Vincent u la maham lypa halor ka jinglong ki MLA na ki seng kiba rit (seng riewlum). Ïa kane u la kren hadien ba la kylli halor ka jingïatreilang bad ka BJP, u Bah Vincent u la ong, “Hapoh Congress, ngi long shai halor ka nongrim, ngim don jingeh ban trei bad kino kino ki seng saiñpyrthei hynrei ka jingïapher ka saiñ pyrkhat ka ïapher bad ka BJP ka khanglad ïa ngi ban ïatreilang bad ki”.
Haba kren pat halor ka jingïatreilang ka NPP-BJP bad ka jingpyrshang jong ki ban thaw sorkar (kane ha shwa ba ki MLA ka HSPDP kin leit pynïasoh), u Bah Vincent u la ong, “Ki don ha ka kam bad kiwei pat ki seng kiba kham rit kin leit pynïasoh bad ki halor ka jingmyntoi shimet jong ki. Dei na kane ka daw ba ka long kaba ma ban jied ïa ki seng kiba rit, ki paidbah ki jied ïa ki namar ka saiñ pyrkhat ka seng ba ki ïeng hynrei shisien ba ki la shah jied, ki pyndonkam bakla ïa ka rai jong u paidbah na ka bynta ka jingmyntoi shimet jong ki”.
U Bah Vincent Pala ha ka 3 tarik Lber u la kdew ruh halor ka daw ba u shah jop bad ong ba ka jingbymlah jong u ban leit jngoh ïa ki paidbah ka konstitwensi, ka Sutnga-Saipung hapoh East Jaiñtia Hills ka dei ka daw bah halor ka jingshah jop.
U Bah Vincent u la shah jop na Sutnga-Saipung ha ka kyrtong ka NPP, ka Santa Mary Shylla da 1828 vote.
“Watla ka jingshah jop, nga ai khublei ïa ki paidbah ka Sutnga halor ka rai jong ki. Nga la ïakhun tyngeh hynrei ha kajuh ka por, nga hap ban peit ruh ïa ka jingleh bha ka seng ha baroh kawei ka jylla bad ngam don por bha na ka bynta ki paidbah ka konstitwensi jong nga, kane ka dei ka daw ba nga rem”, la ong u Bah Vincent.
Haba kren pat halor ka jingshah jied ki san ngut ki MLA ka Congress, u Bah Vincent u la ong ba ki paidbah ki dang don ka jingshaniah ïa ka Congress, namar ki tip ba lada ka Congress ka tlot, ka imlang sahlang ruh ka tlot. “Ngi la pyrshang ban jop bun tylli ki shuki hynrei ngi burom pat ïa ka rai jong ki paidbah”.
Haba kylli pat halor ka dawbah ba ka seng kam lah ban jop bun tylli, u Bah Vincent u la kynnoh ba ka jingkyntiap seng jong ki nongïalam na kawei ka seng sha kawei pat halor kane ka jingbymlah ban jop bha ka seng.
U la ong ruh ba ka Congress ka dei ka bor ba khlaiñ bha hynrei ha kine ki shi snem shiteng, ki nongïalam ka Congress ki la pynsniew dur ïalade bad ïa ka seng ruh kumjuh. “Kumba phi ïohi, kiba bun hi kiba la mih na ka seng ki la liem noh ha kane ka elekshon; bad ki lah ruh ban babe halor kane”, u la ong.
“Ki nongïalam ki la ïa kynthih na kawei ka seng sha kawei pat bad kane ka la pynkulmar ïa ki paidbah, kumta kane ka la ktah ïa ka rukom ïoh vote bad pynmih ïa ka rai kaba pharia, khamtam eh hapoh Khasi Hills”, u la bynrap shuh shuh.
U Ban Vincent u la kdew ruh ïa ki 12 na ki 17 ngut ki MLA kiba la kyntiap sha ka seng TMC ha u snem 2021 bad ïa ki san ngut kiba sah ki MLA kiba la shah suspen kiba la leit kyrshan ïa ka sorkar MDA ba la kyrshan da ka BJP ha u snem 2022. Na kine ki 17 ngut ki MLA ka Congress kiba mynshwa kiba la mih na ka seng bad leit pynïasoh sha kiwei pat ki seng shwa ka elekshon, tang hynñiew ngut kiba la jop biang.
Kine ki kynthup ïa lai ngut na TMC, u Mukul Sangma (Songsak), ka Miani D Shira (Ampati) bad u Charles Pyngrope (Nongthymmai); u Jimmy D Sangma (Tikrikilla) bad u Marthon J Marthon (Mendipathar) kiba la don bynta teng kham mynshwa bad ki 12 ngut kiba leit pynïasoh sha ka TMC hynrei hadien ki la pynïasoh noh bad ka NPP, ka Ampareen Lyngdoh (East Shillong) bad u Mayralborn Syiem (Nongpoh), kiba dei ki ar ngut na ki san ngut ki MLA ka Congress kiba shah suspend bad kiba la leit ban pynïasoh noh sha ka NPP bad UDP.
U Bah Vincent u la kdew ruh ïa ka Garo Hills, ha kaba u la ong ba ka kham duna ka jingpharia ka vote ha kane ka thaiñ haba ïanujor bad ha Khasi bad Jaiñtia Hills namar ha Garo ki kham duna ki seng ba ki paidbah kin jied, ymdei kum ha Khasi Jaiñtia ba bun ki seng riewlum.
U la kynnoh ruh ba ki paidbah ka Garo Hills ki la ai ïa ka rai ym namar ki kam ba bha hynrei namar ka jingtrei borbah ka pisa ha kane ka elekshon.
Haba kren pat halor ka Congress kaba la kiew na ka jingbymdon MLA sha kaba ïoh san ngut ki MLA, u Bah Vincent u la pynpaw ïa ka jingsngewhun halor kane ka rai ki paidbah namar ka seng ka la jop 15 percent.
“Ha kane ka elekshon MDC bad MP ngin ïaleh bha. Ban pynkhie im pat ïa ka seng ka dei ka kam kaba ngin dang hap trei mynta bad nga tharai ban sdang bad ki san ngut ki MLA ka dei ka jingsdang kaba bha”, u la bynrap shuh shuh.
