SHILLONG:
U MLA ka Pynthorumkhrah konstiwensi u Bah Alexander L. Hek u la ong ba ka Bharatiya Janata Party (BJP) ka dei ka seng saiñ pyrthei bad kam dei ka seng niam kumba la sngewbakla da baroh. Kane ka jingkren jong u Bah Hek ka long ba bun ki seng saiñ hima ki la kynthoh bad kynnoh ba ka seng BJP kadei ka seng shit niam.
Haba kren sha ki katto katne ki lad pathai khubor u Bah Hek u la ther da kaba tyngeh ïa kito ki seng saiñ pyrthei kiba la kynnoh bad kynthoh ïa ka seng BJP ba kadei ka seng shit niam shit jaitbynriew. “Ngan ong ïa phi naduh ka seng Congress ruh ha ka por mynshwa ha Arunachal katno ngut ki la ot la pynïap bad ki khang ïa ki Balang Khristan ban leit sha ïingmane lane ban pynlong niam ïano ïano ruh. Hynrei kam dei ba ka leh ka Congress, don hi uwei ar hapoh ka seng kiba katto katne kiba shit niam hynrei ym baroh. Haba shah shoh ki nongwei hapoh ka jylla Meghalaya ngin ong ba baroh ki isih ïa ki bar jylla hynrei kam dei kumta bad 99 percent ki dei ki briew ba bha bad 1 percent kiba sniew, kumta ki pynsniew lut ïa ka imlang ka sahlang”.
U la ong ba ka BJP, UDP, Congress ruh ki dei ki seng saiñ pyrthei bad kam dei ka niam bad ym lah ban ong ba baroh ki shit niam.
U Bah Hek u la ong ba ha ka riti synshar ka Ri India ba baroh ki jait niam ki lah ban shongsuk shongsaiñ ha kane ka jylla baroh kawei. “Lada dei baroh ki briew kidei ki jingthaw jong u Blei kam don jingeh ei ei ban lorni ïa ka jingshakri ïa kano kano ka niam”, la ong u Bah Hek
U Bah Hek u la ong ba hapoh Ri India ym lah ban don artylli ki riti synshar (Constitution) ym lah ban don lai tylli saw tylli ki lama hynrei ha kaba ïadei bad ka niam “Kawei ka niam, kawei ka Ri” kan nym jia da lei lei hapoh ka jingsynshar ka BJP. “Ka Ri India kaba dei kawei ka ri, ban don lai saw tylli ki lama bad ka jingdon kawei ka niam kan nym jia ha ka jingïalam jong ka BJP”.
“Na ka bynta ban don ka jingïatylli ha kaba ka ri India kadei ban don tang kawei ka lama bad kawei ka riti synshar ka ri”, la ong u Bah Hek
U Bah Hek u la ong ba ka BJP kam ju kren shaphang ka niam namar ba kam dei ka seng niam namar kadei beit ka seng saiñ pyrthei kaba peit ïa baroh ki nongshong shnong ka Ri India. “Ha Ri India don lut ki jait niam, ki jatbynriew, lada phai sha ka niam Hindu da ki spah bad hajar tylli ki blei ki don, ki Buddhist ruh don, ki Jainism ruh ki don, ki Muslim bad kiwei ki jait niam”.
U Bah Hek u la ong ba kane kadei baroh tang ka jingpynthame ha ka por elekshon bad ynda la dep elekshon ym ju ïohsngew ei ei. “Ha ka por elekshon ki kynthoh ba ka BJP kadei ka party kaba sniew hynrei ynda ladep ka elekshon baroh ki seng kin sa wad ïa ka BJP”.
“Phi la ju ïohsngew mynta la 4 snem shiteng ba ju ïakren ïa kine kiei kiei, ym ju don re, ïa ka niam ruh ym don ba kren shaphang ka BJP ruh ym don ba kren. Tang namar ba la wan ka elekshon la ïoh ba ki kynthoh ba ka BJP kadei kaba pyrshah Khristan”, la ong u Bah Hek.
“Nga la ïalam bun ngut ki Pastor ki nongïalam niam sha Delhi ban ïakren ïa ki jingdonkam jong ka Balang bad ki nongïalam na shathie ki dang leh ïa kaei kaba kidei ban leh ïa ka kam. Hynrei ha ka por ilekshon ka BJP kadei ka ba pyrshah Khristan”, la ong u Bah Hek
U Bah Hek u la ong, “Wat ki Myntri Sorkar bad u Myntri Rangbah ka jylla , ki dang phah ïalam ïanga ban ïakynduh ïa u Myntri Rangbahduh ka Ri bad ïa u Myntri ka tnad Kam Pohiing ka sorkar pdeng namar nga dei ka lynti ban pyni ïa ki”.
U Bah Hek u la ba ynda ladep ka elekshon baroh ki Myntri sorkar ki wad ïa nga ban ïalam sha Delhi ban ïoh ïa ki kam pynroi.”
Halor ka sorkar Meghalaya Democrartic Alliance (MDA) ba la ïalam da ka National People’s Party (NPP) u Bah Hek u la ong ba la 25 tylli ki snem ba u la trei ha ka kam saiñ pyrthei ym pat ju lap kum kane ka sorkar kaba jur ka jingbamsap.
“La 25 snem nga la trei bad nga la long kum u MLA bad nga shem ba ka NPP ba ïalam ïa ka ka sorkar kadei kawei na ka sorkar kaba jur ka bamsap”, la ong u Bah Hek.
