SHILLONG:
U President ka Meghalaya Pradesh Congress Committee (MPCC) u Bah Vincent H Pala u la ong ba ki paidbah ha ka jylla kim ju dei ban ngeit ïa ki jingkular ka Bharatiya Janata Party (BJP) namar ba ka dei ka party ka ba trei tang na ka bynta ka bha ka miat jong lade ym na ka bynta ka jylla.
Ïa kane u la ong hadien ba la buh ïa ka jingkylli halor ka jingkren ki nongïalam ba hakhlieh duh ka BJP kiba la kynnoh ba ka jylla Meghalaya ka dei ka jylla ba jur tam ka jingbamsap ha shwa ka election bad hadien ka election ka BJP ka synrop lang bad ka NPP kaba ïalam ïa ka sorkar MDA-I.
Ha ba kren bad ki ladpathai khubor u Bah Pala u la ong ba ka jingkynnoh bamsap u Myntri Rangbah Duh ka Ri u Narendra Modi bad u Home Minister ka Ri u Amit Shah,bad ki nongïalam ka BJP, ka dei ka ba la biang palat ban pynshisha ka don ka jingbamsap hynrei hato ki paidbah ki lah ban shaniah ïa ka BJP ka ba shu kylliang ktien man ka por?
“Kumba la ïohi ba ha ka mat kular election ka BJP ki ong ban ïoh jingithuh halor ka tih dewïong, kat ba mynta shwa ka election ki kular ban buh ïa ka Committee ban tohkit ïa ka jingbamsap ha ka jylla hynrei mar ïa dep ka election ki ïa mareh ban ïatreilang”, u la ong.
U la bynrap “Kumta ki briew kim dei ban shaniah ïa ka BJP namar ba kane ka party ha ka jaka ba kin ïaleh ban trei bha na ka bynta ka bha ka miat u paidbah hynrei ki ïaleh ban buhrieh ïa ki kam bamsap ha ka jylla”, u la bynrap.
U Bah Pala u la ong shuh shuh ba “Ka BJP hi ka dei ka party ka ba la sdang ïa ka jingtrei jong ka, tang na ka bynta ka jingbha ka party lade, kumba phi la ïohi ïa ka jingjia ha Laban, halor ka Reservation Policy bad kiwei kiwei, baroh ki jingjia na ka ba sniew sha ka ba kham sniew shuh shuh”.
“Ka imlang sahlang jong ngi ka dei ka ba rit bad ngim lah ban ïaphiah hynrei ka BJP ka treishitom bha ban ïaphiah bad hap ban husiar bad ymdei ban shaniah ïa ki jingkular jong ka”, u la bynrap.
