MAWKYRWAT:
Ka Ranikor Block Congress Committee ha ka sngi Saitjaiñ ki la pynbna ïa ka kong Victorealness Syiemlieh kum ka kyrtong na Ranikor konstitwensi ha ka elekshon MLA 2023.
Ïa ka jingïalang la pyllong ha Dorbar Hall Rangthong, South West Khasi Hills District ha kaba la pdiang pdiang burom ia ka kong Victorealness bad la pynkup burom ruh ïa ka da ka Ranikor Block Congress Committee ha ka jingdon lang u bah Vincent H. Pala u President ka Meghalaya Pradesh Congress Committee (MPCC).
Haba kren ha kane ka jingïalang, u bah Vincent u la ong ba kong Victorealness kan long ka kyrtong ka Congress ban sa iakhun ban ïa aireng na Ranikor constituency ha u 2023.
Ka kong Victorealness ka dei kawei ka nongtrei kaba la shongthait noh na ka kam kum ka nurses kum ka Assistant Director Nursing jong ka Tnad ka Koid ka khiah kaba la ïoh ruh iaka khusnam Florence Nightingale Award 2021 Ha Delhi naka president jong ka Ri India ka Droupadi Murmu.
U Ma Vincent u la ong ba ka Congress ka la ïoh ïa ki kyrtong kiba kynsai tam kiba don ka jingkyrmen skhem ba kin jop suk ha ka elekshon 2023. U la ong ba ka seng Congress kam dei ka seng kaba duk ban ianujor bad kiwei ki seng sain pyrthei hynrei ka dei kaba riewspah tam kaba ym lah ban thied da ka pisa namar ba ka jingriewspah ka Congress ka dei kaba kylluid mynsiem ha ka shynshar khadar ka bym ju ñiew jait bynriew lane iapher niam, ka pynlaitluid ïa ki paidbah khamtam ïa ki jaitbynriew rit paid hagne ha ka jylla Meghalaya.
Ka jingïaleh elekshon ka Congress ym dei da ka pisa hynrei da ka mynsiem ka jingsngew shlur ban ai ka jingshakri kaba bha tam ïaki paidbah ym ban lute na ki ne ban shim noh ia ka hok jong ki paidbah. U la kyntu ia baroh ki nongkitkam jong ka party bad kumjuh ruh ïa ka kong Victorealness ba kin pynsngew thuh ïa ki paidbah da ka jingsngewrit da ka jingieid khlem da shah thied hano hano.
Ïa kane ka jingialang la pynïaid u bah Y.K. Dewsaw u President RBCC bad la ïoh ka jingkren lyngkot na ka kong Victorealness, ba la iadon lang u bah Pynshngain.N Syiem, MDC na Mawkhar-Pynthorumkhrah, u bah Carnes Sohshang MDC ka Mawkyrwat, bah Ronie V.Lyngdoh MDC Mylliem. La don lang ruh u Myntri shnong ka Rangthong bah K.Nongrem, ki riew Rangbah ki longkmie ki nongkyrshan ryngkat da ki spah ngut ki paidbah kiba la wan sakhi lang ha kane ka sngi.
