SHILLONG:
U MLA barim ba dei ruh u kyrtong ka Congress na Mylliem konstitwensi, u Bah Ronnie V Lyngdoh, ha ka 7 tarik Rymphang u la kynthoh ïa kiwei ki kyrtong kiba khot ïa ka Congress ka jhad ba la jan ngam.
Haba kren sha ki lad pathai khubor hadien ka jingthep kyrteng ha Shillong, u Bah Lyngdoh u la ong ba kane ka jingkren ka long kaba khlem nongrim.
“Kumno ngi lah ban ong ba ka Congress ka dei ka jhad ba la jan ngam haba ka seng ka dang don ha baroh ki jylla hapoh ka Ri? Hooid, ngim don ki MLA ba mynta hynrei ka seng ka dang don. Bun ki seng kim don shawei pat hynrei tang hapoh Meghalaya bad don kiwei pat ki seng kiba don tang ha ki katto katne tylli ki distrik hapoh ka jylla. Kumta haba phi kren ïa kano kano ka jingkren, kren ïa kiba phi lah ban pynshisha. Ka Congress kan sa khie khlieh biang kumba ngi la leh ha Himachal Pradesh bad ha Gujarat. Ka Congress kan sa knieh kham bun shuh shuh ki jylla na ka BJP,” la ong u Bah Lyngdoh.
U Bah Lyngdoh u la pynpaw ka jingsngew skhem ban jop na Mylliem konstitwensi bad u la ong ba ka jingkyrshan kaba u ïoh na baroh ki liang ka ai mynsiem ïa u.
U la ong ruh, “Ka jingïashim bynta ki samla ha ka saiñ pyrthei ka ai mynsiem ïa nga bad nga dap da ka jingsngewnguh bad ka jingsngewkmen”.
Shuh shuh u Bah Lyngdoh u la kynthoh ïa u kyrtong ka NPP u Bah Hamletson Dohling da kaba kynnoh ba u Bah Dohling u la thok bad pynbiej ïa ki paidbah ha ki elekshon kiba la dep. “U la thok bad u la shukor ïa ki paidbah da kaba ong ba lada u Bah Ronnie un shah jied biang, un pynïar ïa ki jaka kiban hap hapoh ka jingpeit ka Meghalaya Urban Development Authority (MUDA), ka bym long kaba shisha. Lada phi im da ka waitlam, phin ïap ruh da ka waitlam,” la kynthoh u Bah Lyngdoh.
Haba kylli halor ka jingshah rem ha ka elekshon 2018, u Bah Lyngdoh u la ong ba ka daw ka long namar ba ki paidbah ki la shah ïalam bakla halor ki aiñ tei ïing ne ki building bye-laws. “Ka dei tang kane ka daw. Hynrei hadien ki paidbah ki la sngewthuh, lym kumta ngan ym lah ban khie khlieh biang da kaba jop ïa ka elekshon MDC shi snem hadien. Kane ka pynpaw ba ki paidbah ki dang don ka jingshaniah ha nga bad ha ka Congress,” u la ong.
Halor ka mat jong u pud u sam, u Bah Lyngdoh u la ong ba ka la paw pyrthei ka jingarsap ka sorkar kaba mynta. “Ki pyndonburom ïa ki nongïalam ha ka jingdawa ïa ka jylla hynrei kaei kaba ki leh mynta – 50 snem hadien? Ki don hapoh ka NEDA bad ki pyrshang ban die ïa ki jaka jong ngi. Ngin ym pyndem wait hadien 50 snem ka jingïaleh ban ïoh ka jingjop bad ngin ym shah ban don hapoh ka jingleh donbor ka Assam,” u la ong.
