SHILLONG:
U President ka Meghalaya Trinamool Congress (TMC) u Bah Charles Pyngrope, ha ka 10 tarik Rymphang u la ong ba ka rai jong ka Meghalaya High Court, ban khot noh ïa ki Central Armed Police Forces (CAPF) ban tehlakam ïa ka jingtih bad khaïi dewïong beaiñ ka dei ka jinglehraiñ ka ba khraw ïa ka tnad pulit ka ba khlem shim khia ban tehlakam ïa ka ne ka kam beaiñ ha ka jylla.
Lah ban kdew hangne ba ka Meghalaya High Court, ha ba tian bishar ha ka sngi baar, ka la ong ba ka long ka ba donkam ban khot noh ïa ki central armed police forces (CAPF) ban lah ban pynsangeh ïa ka jingtih beaiñ bad ka jingkhaïi beaiñ ïa u dewïong ha ka jylla.
U la ong “Ka jingkhot ka High Court, ïa ki bor pulit na Central ban pynsangeh ïa ka jingtih bad jingkhaïi dewïong beaiñ ha ka jylla, ka dei ka khubor ïa ka sorkar ba kam shem la shimkhia eiei ha ka ba ïa dei bad kane ka mat bad kane ka jingbym shim khia ka sorkar ka pynpaw ba ka sorkar ka ñiewbeiñ ïa ka hukum ka ïingbishar”.
“Kane ka hukum kan ktah bha ïa ka tnad pulit ha ka jylla, ka dei ka jinglehraiñ ïa ka tnad pulit namar ba ïa ka kam ka ba ki dei ban leh mynta la hap ban aiti noh sha ki bor pulit na central na ka daw ba ka tnad pulit ha ka jylla ka khlem shim khia eiei, bad ha ba ki don hapoh ka uniform ki la ïoh bor ban tehlakam ïa ki kam beaiñ, bad ka jingtih bad khaïi dewïong ka dei ka kam beaiñ kumno ki shah,” u la bynrap.
U la bynrap shuh shuh ba “Kane ka mat dewïong ka ba la rah hapoh parliament ka dei ka mat jingbamsap ka ba la ktah ïa shibun ngut ki nongshong shnong, bad lyngba ka ne bun ki kam bamsap jong ki briew ki ba la pyrta ïa ka synshar ba khuid kan sei”.
