SHILLONG:
U President ka Voice of the People’s Party (VPP) u Bah Ardent M Basaiawmoit u la kynthah ba ka jingkhot jong ka United Democratic Party (UDP) ban ïathaw sorkar ki seng riewlum khlem ka National People’s Party (NPP) bad ka Bharatiya Janata Party (BJP) ka dei tang ka drama lyngkot ban pyni sha ki paidbah katba ka jingmut ka long da kumwei.
Haba kren ha ka 6 tarik Lber, u Bah Ardent u la ong ba ka UDP ka la khot ban ïathaw sorkar hynrei kam shym la urlong hadien ba la jah 2 ngut ki MLA ka Hill State People’s Democratic Party (HSPDP) ha ka por ba thmu ban thaw ïa ka sorkar. “Lada peit ïa ka jingjia, lah ban sngewthuh ba ka dei tang ka drama. Ngi la rai ban shong beit ha ka liangpyrshah”, la ong u Bah Ardent.
U la ong ba namar ba kam don ka jingthmu naduh ba nyngkong naduh ka UDP, PDF, HSPDP kam don jingeh ban wanrah ïa ka sorkar ki seng riewlum hynrei ha kato ka sngi namar ba la ïohi ïa ka sur u paidbah kiba kwah ban ïoh ïa ka sorkar, kila shu leh drama.
“Kane ka jingleh ban ïathaw sorkar ki seng riewlum ka dei tang ka drama kaba la pynwandur bad la dei ban ai jingïaroh ïa u director bad kane ka dei ka jinghikai ïa ki paidbah namar u sohjew um lah ban kylla sohthiang”, la ong u Bah Ardent.
U la ther ba ka jingjied jong ki ban leit sha ka sorkar ka paw ba ka la don ka jingïapynbeit lypa hynrei lada ki ong bym lah, balei kim shong ha ka liangpyrshah.
