SHILLONG:
Hadien ba la mih ki khubor ba ki ar ngut ki MLA ba mihkhmat na ka seng People Democratic Front (PDF), kata u Bah Banteidor Lyngdoh bad u Bah Gavin Mylliem kin leit ban pyniasoh noh ialade bad ka National People’s Party (NPP), ha ka 13 tarik Ïaïongna ka liang u President jong ka seng PDF u ba long ruh u MLA ka Sohra Konstitwensi, u Bah Gavin Mylliem u la kubur ba ka don ka jingtyrwa na ka liang ka NPP ban pynïasoh noh sha ka ne ka party kaba ïalam ïa ka sorkar Meghalaya Democratic Alliance (MDA-II).
“Na ka liang ka NPP, hooid ka la don kum kata ka jingtyrwa hynrei ïa kita kita baroh ka por kan sa batai, bad ka NPP ka la kyrpad ïa ngi ki MLA ka PDF ban pynsïasoh noh sha ka NPP hynrei ka por kan sa batai, namar ba ngim pat shim rai eiei ba ngin rung ne em”, la ong u Bah Gavin haba kren sha ki ladpathai khubor.
Ha ba phai sha u Working President ka PDF u ba long ruh u MLA ka Mawkynrew Constituency, u Bah Banteidor Lyngdoh, u khlem kyntait ïa kane ka khubor, da ka ba ong ba ka party kan sa ïakren ïa kane ka kam ynda la dei ka por.
“Ka la don ka jingïakren halor ka jingpynisoh noh sha ka NPP, hynrei ngin sa shim ïa ka rai ha ka por ba biang bad ngin sa pyntip sha baroh, hynrei kumba long mynta hi ym lah ban kren eiei halor kane ka bynta namar ba ngam kwah ban rai marwei”, u la ong.
Mynta ka sngi, ka la saphriang ka khubor ba ki ar ngut ki MLA ka People’s Democratic Front (PDF) u Bah Banteidor Lyngdoh u MLA ka Mawkynrew Konstitwensi bad u Bah Gavin Mylliem u MLA ka Sohra Konstitwensi ba ki lah ban pynïasoh noh sha ka party ka ba bat ïa u lakam synshar ka National People’s Party (NPP).
Halor kane ka khubor, katkum ka tyllong khubor na ka NPP ka la pynthikna ïa kane ka khubor ba “Ki ar ngut ki MLA ka PDF kin sa wan ban pynïasoh sha ka party NPP ha kine ki khyndiat sngi ban wan ha shwa ka election ha Sohïong Konstitwensi, wat la ïa ka tarik ym pat lah ban buh”.
Ki tyllong khubor ka NPP ka la pyntip ruh “Lem bad kine ki ar ngut ki MLA, ki don ruh ki nongïalam ba hakhmat tam jong ka PDF ki ba ladep ban pynïasoh bad ka NPP ha u snem ba la dep, bad ynda kine ki MLA ki la pynïasoh sha ka NPP kiwei pat ki nongïalam ka PDF kin sa wan ban budlang”.
Lah ban kdew hangne ba ka NPP ka ba don 26 ngut ki MLA mynta kan nang khlaiñ shuh shuh lada ki MLA ka PDF kin leit banpynïasoh ha kaba ka jingdon ki MLA kan kiew sha ka 28 ngut.
Lada ki MLA ka PDF kin leit ban pynïasoh sha ka NPP, ka lah ruh ban don ka jingkylla ha ki jinglong jingman ha ka saiñpyrthei namar ka jingbujli shuki myntri ha ka sorkar MDA-II.
