MAWSYNRAM:
Sa shi bnai tam mynta, ki paidbah ka jylla kin ïoh ïa ka lad ban jied ïa u nongmihkhmat sha ka ïing dorbar thawaiñ bad napdeng ki konstitwensi ha nongkyndong, ka Mawsynram ha East Khasi Hills kan sakhi ïa ka jingïakhun kaba kham pher ha kane ka kynti.
Ka daw ka jingkhampher ka elekshon ha Mawsynram ka dei namar ba u MLA uba dang shu iehnoh shen ïa ka jinglong MLA u Bah Himalaya M Shangpliang uba jop na ka Congress, dang shen u la leit pynïasoh noh sha ka BJP, kaba ju kheiñ kum kawei na ki seng kaba dang sahdien bha ha kane ka jylla.
Napdeng bun ki kyrtong, la sngewthuh ba haduh mynta 3 ngut ki rang ïaleh kiba kham paw, ki dei u Bah Himalaya na ka BJP, u Bah Alvinstone Sawkmie u MDC na ka NPP, bad kumjuh u Bah Ollansing Suiñ na ka UDP nalor u Vincent T Sangma na TMC.
Ha ka jingtwad jingtip na ki paidbah ha ïew Mawsynram, kiba bun kila pynsngew ïa la kajong ka jingsngew jong ki halor ki kyrtong bad ka rukom tyrwa jong ki sha ki paidbah. Watla ki don kiba pynpaw ba ka jingkynriah sengjong ki kyrtong ka lah ban ktah hynrei don kiba pynpaw ba ki peit ïa u briew ym ïa ka seng.
Ka Mawsynram ka don ar bynta ka rukom ki nongshong shnong, kawei ka bynta sha rilum kaba bun ki dei ki Khasi katba ka bynta ba shathem ka don ki nongshong shnong ba iakhleh lang naduh ki Garo, bad kiwei pat.
Halor ka jingkylli ïa ki kam jong u MLA ba mynta, ki la ong ba don kiba u la leh bad don ki bym shym la leh bad kumjuh ïa u MDC hynrei ïa kiwei ki bym pat jop, kim pat nang ban ong eiei namar ba kim ïoh ban pyni kam.
Don kiba pynpaw ba ki sngew artatien ïa ka BJP hadien ba ka la mih ka khubor ba shah thombor ki Khristan shabar jylla hynrei don kiba ong ba kin peit ïa u briew bad ka parti kan wan hadien. Kumba la tip, ki kyrtong baroh ki dei kiba la biang suda ka jingnang ka jingstad.
Katto katne ki longkmie bad ki rangbah kila pynpaw ba ka por ka dang don bad kin sa rai kham hadien ynda la jan ka sngi thep vote ha ki sngi ban wan.
