SHILLONG:
Ka Inner Line Permit (ILP) ka la sah teng ha Delhi la saw snem bad na ka liang u national general secretary ka BJP u Rituraj Sinha u dang ong ba hap ban ïatai bha hadien ka elekshon bad kane ka long kaba sngew thamula, la ong ka KHNAM.
Ha ka kyrwoh kaba la pyllait, ka KHNAM ka la ong ba ka mih ka jingkylli ba ha kine ki saw snem ba la dep, hato ka ILP ka la shu sahkut tang ha ki almari ha Delhi?
Ka Sikkim kaba la paw bha kum kawei na ki jaka jngohkai pyrthei ha ka Ri India bad pyrthei baroh kawei ka don ïa ka Restricted Area Permit (kaba long kum ka ILP) bad ruh ïa ka Protected Area Permit bad kine ki jingpyrkhing ki khlem pynhiar ïa ka kam jngohkai pyrthei hynrei ka dang kyntiew. Namar kata ka jingong jong u Rituraj Sinha ba ka ILP kan kthah ïa ka tourism ka long kaba bakla.
“Ka ILP ka dei ban ïada ïa ka hok longtrai jong ki rit paid kumba la ïohi jngai da ki bor synshar phareng kiba la kynthup ïa ka Ri Khasi ha ka BEFR 1873, namarkata ka ILP ka long kaba donkam bha bad ngim lah ban ïapeiñ ïa ka hok longtrai jong ngi bad ka spah. namar dang lah ban longtrai ha ka jingduk bad ïa ka jingriewspah ha ka jinglong mraw”, la ong ka KHNAM.
Ka seng ka shim ruh ba ka sorkar barim bad baroh 60 ngut ki MLA ki la shu pass arsap ïa ka resolution halor ka ILP ha u snem 2019, namar ym ïohi ba kan don ka jingbuddien bad ka jingtynruh ba shong nongrim ha kine ki saw snem ba la leit.
Ha ka 11 tarik Nohprah 2019 ka Sorkar MDA ka la pdiang da ka jingkmen ïa ka jingpynbna jong u President ka Ri India kaba la weng noh ïa ka kyntien Khasi-Jaiñtia na ka Preamble jong ka Eastern Bengal Frontier Regulation Act 1873, bad ym ïohi ba kan don ka jingpyrshah lane ka jingmudui pyrshah ïa kane ka jingpynbna namar ka jingweng ïaka kyntien “Khasi-Jaiñtia” na ka BEFR 1873 ka pynkheiñ im im peit peit ïa ka clause (3) (a) jong ka Article 372.
Ka bor ban pynkylla ïa kum kine ki kyndon ka riti synshar ka ri ha kano kano ka por ka shong beit tang ha ka Parliament.
“I Bah H.S Shylla bam kwai ha duwar u Blei, kum u CEM ka KHADC u la mudui pyrshah ïa kane ka jingpynbna hynrei hadien ka jingkhlad noh jong une u nongïalam wat ka KHADC ruh ka khlem shimti ïa lane ka kam”, la bynrap u Bah Thomas Passah, Vice President ka KHNAM.
