SHILLONG:
U kyrtong ka Trinamool Congress (TMC) na Mylliem konstitwensi, u Bah Gilbert Laloo, ha ka 4 tarik Rymphang u la thep kyrteng ban ïakhun ïa ka elekshon ka ban sa long ha ka 27 tarik Rymphang, ha ka jingïasynran lang ki nongkyrshan jong u.
Haba kren sha ki lad pathai khubor hadien ba la dep thep kyrteng, u Bah Laloo u la ong ba lada ki paidbah ki ai lad ïa u ban long u nongmih khmat na konstitwensi, un pyndep ïa ki kam kiba dang sah khamtam eh ha kaba ïadei bad ka jingkyrduh kam kyrduh jam jong ki khynnah samla bad ka jinghiar ha ka rep ka riang.
Haba jubab halor ka jingsngewskhem jong u ban jop ïa ka elekshon, u Bah Laloo u la ong ba kum ki kyrtong ki long kiba sngewskhem namar ka rai kadei ka jong u paidbah.
Haba kren halor ka bor ka pisa ha konstitwensi, u Bah Laloo u la ong ba ha man la ki konstitwensi kane ka don hynrei lada ki paidbah ki sngewthuh ba ka bor jong ki ka kham khlaiñ, ki dei ban peit bha ban ïoh ïa ki nongthaw aiñ kiba biang namar ka jingjop kam dei ha ka bor ka spah hynrei ha ka bor u paidbah. U la ong ba dei ki paidbah kiba la wan sha u bad pynlong ïa u ban ïakhun ïa ka elekshon MDC, watla um shym la jop, hynrei mynta ka kynti ruh ka shong ha ka bor bad ka mon jong ki paidbah.
Ha kawei pat ka liang, u Bah Laloo u la kynthoh ïa ki nongmih khmat kiba tang shu wan ka elekshon hapoh ki ar bnai ba la dep ki la shu syrdep ïa ki surok.
Shuh shuh u Bah Laloo u la ong ba ka kamram jong ki MLA ka long ban don ka jingïajan ka jingïadei bad ki paidbah bad ki longïing longsem.
Ha kaba ïadei bad ka jingshah kynthoh ka TMC ba ka dei ka seng na bar, u Bah Laloo u la ong ba ka Congress ruh ka dei ka seng na bar hynrei ki seng riewlum ki ïasnoh bad ka mynba ka don ha ka bor. Kumjuh ruh u la ong ba la kynthoh ïa ka NPP ba ka dei ka seng Garo, hynrei ki seng riewlum ki ïasnoh bad ka haba ka wan ha ka bor. Kumta u la ong ba lada ka TMC kan wan ha ka bor, kajuh hi kan sa long bad kito kiba kynthoh hi kin wan ïasnoh.
Haba jubab halor ka jingkynthoh ba ki skhim ka TMC kum ka WE Card bad ka MYE Card ki long tang ki jingpynbiej ïa ki paidbah, u Bah Laloo u la ong ba lada ka TMC ka don ha ka bor bad kam leh ne pyndep ïa kine ki jingkular, te ki dei tang ki jingpynbiej, hynrei ka TMC kam pat don ha ka bor kumta u Bah Laloo u la ong ba kumno kin ong ba ka TMC ka pynbiej.
