SHILLONG:
U President ka United Democratic Party (UDP) u Bah Metbah Lyngdoh, ula pynpaw ïa ka jingsngew lyngngoh ba um lah sngewthuh ba mih ki jingkylli la kan don ne em ka jingkylla ha ka Sorkar hadien ba ka Party ka la ïoh ïa ka jingjop na Sohïong Konstitwensi.
Na ka liang u bah Metbah u la kren shai ba kum kane kam don ha ka rukom pyrkhat jong ka seng, ” ka jingjop u Bah Synshar ha ka elekshon na Sohïong Konstitwensi ka long ban pynkhlaiñ ïa ka Party.”
U la bynrap da kaba ong, ” ka jingjop kan long ka jingpynkhlaiñ ïa ka MDA II ha ka jingïalam ka National People’s Party (NPP) ha kaba ka Party UDP ruh ka ïatreilang.”
U la ong ba ka jingïakren ban kylla ka Sorkar ka dei tang ka jingkren sharum shaneng bad ka Party kumba la ai ïa ka rai bad kular ïatreilang ha ki san snem ba la dep ha ka MDA I bad ha kane ka kynti ba mynta ha ka MDA-II ruh ka UDP ka ïatreilang ban wanrah ka jingskhem ka Sorkar ryngkat ka jingkhmih lynti ba kan leh ïa ki kam ban kyntiew bad lada ym ïatreilang kan wanrah pynban ka jinghiar arsut.
