SHILLONG:
U Bah Vincent Pala, MP jong ka Congress na Shillong Parliamentary Seat, u la ong ba ka jingkhyllem ka EC ha Khasi Hills Autonomous District Council (KHADC) ka dei namar ka jingïashrut hapdeng ka NPP bad ka UDP bad hadien ba la khyllem ka EC ki sa khot ïa ka Congress.
Haba kren bad ki lad pathai khubor mynta ka 21 tarik Jylliew, u Bah Vincent u la ong, “Ka jingïashut, ïa kynnoh para maki ka wanrah ïa ka jingkhyllem bad hadien kata ki sa khot ïa ngi”, la ong u Bah Vincent bad ong ruh ba ka jingleit kyrshan ka Congress ka dei na ka bynta ka jingbha jong u paidbah bad ka Council.
Kawei pat ka dawbah ba ka Congress ka leit kyrshan ïa ka NPP ha KHADC katkum u Bah Vincent ka dei halor ka jingthmu jong ka BJP ban pynkylla ïa ka Sixth Schedule ha Parliament.
“Ngi kum ka seng ngi la pyrkhat bha halor ka Sixth Schedule kaba lah sdang naduh ka por jong ka Congress, kaba la ai kyrpang na ka bynta ka Riti ka Dustur, ka jaka ka puta jong ngi, ka jingskhem jong ki ka dei ha ka Sixth Schedule”, la ong u Bah Vincent.
Hooid ka don ka jingïapher jingmut hapdeng ka Congess bad ka NPP haba phai ha ka sorkar jylla, namar ka Congress ka shong ha ka liang pyrshah, katba ka NPP ka ïalam ïa ka sorkar synrop, kata ka MDA II.
Hynrei na ka liang u Bah Vincent u la ong ba dei ban klet noh ïa kane ka jingsngewïapher hapdeng jong ki na ka bynta ka amendment jong ka Sixth Schedule. “Na ka bynta ka amendment jong ka Sixth Schedule, ngin nguid ïa kaei kaei, tangba ngi dei ban don bynta ban ong ei ei”, la bynrap u Bah Vincent.
U Bah Vincent u la pynpaw ruh ba lada ka seng ka kwah ban kren eiei halor kane ka Sixth Schedule ki don ar tylli ki lynti, “Ban mih sha surok ban pyrshah ïa ka BJP lane ban rung hapoh ka District Council bad ai ka Resolution hapoh ka District Council, khnang ba kaei kaei kaba ngi don kum ka seng ngi lah ban ai”.
Bad na ka liang u Bah Vincent u la ong ba kum ka seng ka la shim da ka rai ba ban ïa kaba mih sha surok ka khambha ba kin ïatreilang ha District Council ban pan ïa ka resolution khnang ban ïoh ban pynkylla ïa ka Sixth Schedule.
Na ka liang u Bah Vincent u la kdew ruh katto katne ki jingthmu ban pynkylla ha ka Sixth Schedule ha kaba ki Syiem bad ki Rangbah Shnong kin duhbor noh bad kan don beit da ka elekshon lane ka jingjied ki paidbah kaba wan beit beit na ka election commission. “Ka bor jong ki syiem bad ka bor jong ki rangbah shnong kam don shuh bad kane kan wanrah buh ki jingïakajia”, la bynrap shuh shuh u Bah Vincent.
Shuh shuh Bah Vincent u la ong ba ka thong jong ka seng Congress ka long ban ïada, ban pynneh pynsah bad pynkiew ïa ka riti ka dustur bad ki shem ba kane ka jingpynkylla ïa ka Sixth Schedule ka long kaba ktah bad kim lah ban don ha ka sorkar bad kim lah ban pynsngew ha ka Parliament, hynrei mynta kaba sah ka long ïa ki tang ban rung hapoh ka District Council.
Halor ka jingkam ba ka lah ban don ka jingïatreilang hapdeng ka Congress bad ka NPP ha ka sorkar jylla, na ka liang u Bah Vincent u la kren shai ba ka sorkar jylla bad ka District Council kam don bynta eiei watla ka dei kajuh ka seng sainpyrthei kaba bat ïa ka bor synshar, hynrei ki don la ka jong ka bynta.
“Ka jingrung jong ngi ha ka District Council ka dei tang na ka bynta ka jingbha jong u paidbah bad ban pynneh pynsah ïa ka riti dustur”, la ong u Bah Vincent.
