SHILLONG:
U Myntri ka sorkar jylla uba dei ruh u MLA ka Bharatiya Janata Party (BJP), u Bah AL Hek, ha ka 3 tarik Ïaïong u la ong ba ka jingtharai ïa ka BJP kum ka seng kaba pyrshah Khristan ka dei kawei na ki daw ba ka seng kam shym la jop palat ïa ki ar tylli ki shuki ha ka elekshon ba dang shu dep ha ka jylla.
“Ngi dang trei shitom ban weng noh ïa kane ka jingmut kaba sniew pyrshah ïa ka BJP,” la ong u Bah Hek haba kren halor ka jingbym lah ka seng ban jop palat ïa ki ar tylli ki shuki.
“Ban pyndam ïa kane, phi lah ban kynmaw ba wat u Myntri Rangbah duh ka Ri u Narendra Modi u la leit jngoh ïa ka Vatican bad u la ïakynduh ïa u Pope Francis. Ha kane ka jingleit jngoh, la ïohi ba kine ki ar ngut ki la ïa kdup ieid bad u Myntri Rangbah duh ka Ri u Modi u la khot sngewbha ruh ïa u Pope ban wan sha India,” u la ong.
U Bah Hek u la ong ba ka jingleit jngoh u Modi ka long kaba shai bad kane kadei kawei na ki lad ban pynsngewthuh ba ka BJP kam long pyrshah ïa ki Khristan.
