SHILLONG:
U MDC ba shu thung ha ka Khasi Hills Autonomous District Council, uba long ruh u nongïalam barim ka United Democratic Party (UDP) u Bah Bindo M Lanong mynta ka 18 Tarik Nohprah, 2023, u la pyntip ba kum u MDC, un ai noh ka jingkyrshan bapura sha ïa ka kynhun ba ïalam ïa ka KHADC ka Khasi Hills Democratic Front (KHDF) ba la ïalam da ka National People Party.
Lah ban kdew hangne ba ïa u Bah Bindo M Lanong la jied kum u MDC ba la shu thung na ka Party UDP, ha ka 28 tarik Jylliew 2019.
Haba kren sha ki lad pathai khubor u Bah Bindo M Lanong u la kdew ba kane ka rai kaba u la shim ban ai noh ka jingkyrshan sha ka party ba ïalam ïa ka KHADC ka long hadien ba na ka liang ki nongïalam ka UDP ki la leh bym suidñiew ïa ka jingdon jong u ha ka party UDP.
“Wat hadien ba ka UDP ka la kyntait ban ai ka tiket ban ïakhun ïa ka MLA election, ruh nga la phah da ka shithi ban pynpaw ïa ka jingkwah ba ngan ïa khun ïa ka MP election na ka UDP bad kyntu ïa ki ba kin klet noh ïa kaei kaba la jia hynrei haduh mynta kim pat shem la jubab eiei” u la ong.
U la bynrap ruh ba ” ki nongïalam ka UDP, wat ha ka jingïalang ka General Council ka party ruh kim shym la khot bad pyntip eiei shuh ïa nga, u nongseng ïa ka UDP kumta ngam banse shuh ban shim noh ïa lade kum u briew ba khlem seng shuh”.
U Bah Bindo u la ong ruh haduh mynta um pat ju kyrtiap seng hynrei ka jinglong jingman bad ka rukom leh ki ïalam ka UDP ka la pynlong ïa u ba un long marwei bad shim ruh ïa ka rai ban ai noh ka jingkyrshan ba pura sha ka kynhun ba ïalam ïa ka KHADC hapoh ka jingïalam u bah Pyniaid Sing Syiem.
U la pynshai ruh ba haduh mynta ym pat shim kano kano ka rai ban pynïasoh sha kano kano ka party hynrei hadien ba u la shah ïeh marwei na ka party UDP, u la ñiew ïalade kum u MDC shimet bad rai ban ai noh ka jingkyrshan ba pura sha ka kynhun ba ïalam da u Bah Pyniaid Sing Syiem kum u CEM ka KHADC
