SHILLONG:
U Bah Hamletson Dohling, u ba dei u MLA ba mynta ka Mylliem konstitwensi bad u ba bat ruh kum u Myntri ha ka Sorkar Jylla, haba kren halor ka elekshon sha ka Ïing Dorbar Thawaiñ ka Jylla Meghalaya ka ban long ha u snem 2023, u la ong ba ki paidbah nongthep vote ka Mylliem konstitwensi kim peit Party hynrei ki peit ïa u briew uba trei ïa ka kam.
Haba kren ha ki lad pathai khubor ha ka 30 tarik Nohprah, hadien ka jingwan buh syntiew kynmaw burom ïa ka jingdap 160 snem ka jingkhlad u Woh Kiang Nangbah ha u tyllai phasi ki phareng, u Bah Hamletson u la ong ba ka jingmih noh jong u na ka seng saiñ hima ka People’s Democratic Front (PDF) na kaba u la jop ïa ka elekshon MLA ha u snem 2018 kam dei satia ka rai marwei hynrei ka rai lang jong ki nongkyrshan na ka konstitwensi.
U Bah Hamletson un ïehnoh ïa ka kam MLA mynta ka samoi ha ka 4 tarik Kyllalyngkot 2023, khnang ban pynïasoh pat sha ka National People’s Party (NPP) ha ka 7 tarik Kyllalyngkot 2023 bad pynkhreh ban ïa aireng biang pat ïa ka elekshon MLA da ka ticket NPP. U la ïathuh ruh ba un pyllait ruh ïa ka thup jingtreikam jong u ha ki san snem ba la dep ha ka jinglong MLA jong u ha katei ka sngi ba un pynïasoh sha ka NPP.
