SHILLONG:
U President rangbah jong ka United Democratic Party (UDP), u Bah Metbah Lyngdoh u la ong ba ka seng jong u ka la leit pynïasoh bad ka sorkar synrop jong ka Meghalaya Democratic Alliance (MDA) 2.0 ban pynthikna ba kan don ka sorkar kaba skhem bad khnang ba ka sorkar kan lah ban pyndep ïa ki kamram ba ka dei ban leh.
U Bah Metbah u la ïathuh ruh ba wat ha ka por jong ka MDA 1.0 (2018-2023), ka UDP ka la shim ïa ka rai bad kan nym long ka daw jong ka jingkhyllem kano kano ka sorkar.
Kane ka jubab jong u President ka UDP ka long hadien ba la mih ki jingkylli ba hato ka jingjop jong ka seng na Sohiong Konstitwensi, kan wanrah ne em ïa ka jingkylla ha ka sorkar.
Katkum ka jingïathuh u Bah Metbah, kine ki kyntien kim dei kiba mih na ki nongïalam jong ka UDP.
U la ong, “Ka sorkar kam don kaba kum kane ka rukom pyrkhat ba kan leit ban pynkhyllem ïa kano kano ka sorkar”.
U la ong ruh ba um don kaba kum kata ka jingpyrkhat.
Une u president ka UDP u la ong ruh ba ka jingjop jong u Bah Synshar Kupar Roy Lyngdoh Thabah ym tang ba ka pynkhlaiñ ïa ka seng hynrei ka pynkhlaiñ ruh ïa ka sorkar synrop.
U la ong ruh ba ka jingjop ka UDP ha Sohiong ka dei namar ka jingieit jong ki paidbah ïa u Bah HDR Lyngdoh, uba la shakri ïa ka konstitwensi da ki bun tylli ki snem kum u MLA.
“Kane ka jingjop ka dei ka jingburom ïa u Bah HDR Lyngdoh (bam kwai ha dwar U Blei) uba la trei na ka bynta ki paidbah bad ka konstitwensi, bad kane (elekshon) ka dei ka kabu ïa ki paidbah ban siew kylliang da kaba vote na ka bynta u Bah Synshar Lyngdoh”, la ong u Bah Metbah.
Lah ban kdew hangne ba ka elekshon ha Sohiong ka dei kaba la sahteng hadien ka jingkhlad noh u kyrtong ka UDP, u Bah HDR Lyngdoh, uba la khlad shi taiew shwa ban sdang ka elekshon, kata ha ka 20 tarik u Rymphang. Ha ka jaka jong u ka UDP ka la pynieng da u pyrsa kur jong u, u Bah Synshar Kupar Roy Lyngdoh Thabah.
Da kane ka jingjop, ka UDP mynta ka la don 12 ngut ki nongthaw aiñ ha ka ïing dorbar thawaiñ ka jylla.
