NONGPOH:
U Bah George B. Lyngdoh, kyrtong ka Trinamool Congress (TMC) na Umroi, ha ka 4 tarik Rymphang u la pyndep ïa ka jingleit thep kyrteng hakhmat u Returning Officer ha ka ophis u Deputy Commissioner, Nongpoh.
Haba kren sha ki lad pathai khubor, u Bah George Lyngdoh, u la ai ka jingkhublei kaba kyrpang eh ïa ki paidbah jong ka Umroi ba ki la ailad ïa u ban long kum u nongmihkhmat sha ka ïing dorbar thawaiñ jong ka jylla ha kine ki 5 snem ba la dep, ha kaba u la ïoh ruh ban kren halor shibun ki mat na bynta katei ka Konstitwensi bad ïa ka jylla hi baroh kawei.
Haba batai halor ka jingmih na ka Congress bad ban ïakhun noh na ka TMC, u Bah George Lyngdoh, u la ong ba katei ka jingmih jong u, ka dei kaba u la sngewthuh jingmut bad ki nongkyrshan jong u.
Lyngba jong katei ka sngi, utei u kyrtong ka TMC na Umroi, u la pynpaw ruh ïa kata ka mynsiem kaba khia halor ka jingdon ki kyrtong, kiba la leit ban rung ïing da kaba sam Pisa bad Blanket sha ki briew, halor katei u Bah George Lyngdoh, u la ong ba kaba kum katei ka jingleh da ki kyrtong, ka long ban thied ïa ka jingmut ba lui lui jong ki paidbah bad kaba sngewsih eh ka long ba ki mut ban thied ïa ka lawei bad ka nongrim jong ka Ri Bhoi District hi baroh kawei.
