SHILLONG:
U Myntri Rangbah ka jylla, u ba long ruh u National President ka National People’s Party (NPP) u Conrad K Sangma u la ong ba ka National People’s Party (NPP) ka khring da ka kam, ym da ka pisa ïa ki nongïalam jong kiwei ki party.
Haba kren bad ki lad pathai khubor, u Conrad K Sangma u la ong ba um don jingtip eiei halor ka jingkam jong u Myntri ka tnad rep ka riang u Bah Banteidor Lyngdoh u ba la kam ba ka NPP ka thong da ka pisa ka ba long T.5 klur ban pynïasoh sha ka party NPP.
U Myntri Rangbah u la ong ba ka sorkar MDA ka ba la ïalam da ka party NPP, ha kine ki 4 snem shiteng, ka la lah ban pynurlong shibun ki kam pynroi ha baroh kawei ka jylla.
“Ha kine ki san snem duna ka jylla ka la ïoh shibun ki surok ki ba khlem lah ban pynurlong mynta ka 20 snem. Ka sorkar MDA hapoh ka jingïalam ka NPP ka la dep ban pynurlong ïa ka jingïasoi ïa ka Memorandum of Understanding (MoU) ban pynbeit noh ïa ka jingïakajia u pud u sam ha ka wad ba nyngkong bad ka jylla Assam”, u la ong .
“Ki nongrep bad ki longkmie lyngba ki self help groups ki ba la ïoh shibun ki jingmyntoi, ka sorkar ka la shim khia na ka bynta ki khun samla ha ka jylla la ka dei ha ka jingpynlong ïa ka Meghalaya Games bad ka North East Olympics bad la shna ïa ki jingtei (infrastructure) na ka bynta ki samla bad ïa kine ym ju don ba shim khia ha ki por ba la dep”u la bynrap.
U la ong ruh ba ka sorkar MDA ba la ïalam da ka NPP ka la lah ban pynurlong ïa ka kam pynroi ha ka jylla bad ka dei kane ka daw ba ka NPP ka la khring ïa ki nongïalam na kiwei ki party ban pynïasoh sha ka party NPP.
