NONGSTOIÑ:
U Chief Youth Adviser ka Seng United Democratic Party (UDP) u bah Eugeneson Lyngdoh, u la hiar sha Nongstoiñ ban ïalap election ïa u kyrtong ka UDP Nongstoiñ u bah Polestar Nongsiej ha ka jingïalang kaba la long ha ka 1 tarik Rymphang ha Madan Riew Blei jong ka thaiñ Umyïap West Khasi Hills District.
Haba ai jingkren ha katei ka jingïalang u bah Eugeneson u la ong ba naduh ba ïoh la ka jong ka jylla dei tang shisien ba ka UDP ka la ïoh ban synshar ïa ka jylla, kata ha u snem 1998 hapoh ka jingïalam jong u (L) E.K Mawlong kum u Chief Minister ka jylla bad ha kato kapor ba synshar ka UDP ka jylla kala ïoh ïa ka jingïaroh na ka sorkar pdeng kum ka jylla kaba biang tam.
U la ong ruh ba dei ka UDP kaba la sdang ban lam khmat nyngkong ban ïakren bad ka sorkar Assam halor u pud u sam bad ha kapor ba i kong Roshan Warjri i long myntri sorkar la lah ban pynshna ïa ki jaka sah (quarter) na ka bynta ka jingthmu ban pynkynriah noh ïa ki harijan hynrei ym shym pat lah ban pynkynriah haduh kine ki sngi.
“Ha ka jingïaid lynti ka jong nga kum u MLA nga ïohi ba shibun ki MLA ki ïa pynksan ha ka jingsam skhim hynrei to tip ba ka skhim kadei jong u paidbah ym jong u MLA bad ka kam jong u MLA kadei ban thaw aiñ bad ban ïasaid na ka bynta ka bit ka biang jong u paidbah ym ban shu long ki nong sam skhim” ong u bah Eugeneson.
