NONGPOH:
U Bah Plielad Tiewsoh, uba la bat kum u President jong ka seng National People’s Party (NPP) ha Nongpoh konstitwensi bad uba bat ruh kum u Vice-President, u la pynbna ïalade ba u la ïehnoh noh na ka Party ha ka 7 tarik mynta u bnai halor shibun bah ki daw.
Ha ka kyrwoh kaba u la phah sha ki lad pathai khubor, utei u nongïalam ka NPP ha Nongpoh konstitwensi, u la ong ba ha kine ki bnai kiba la dep, la don ka kynhun hapoh ka Party NPP, kiba ym kwah ïa u ba un long kum u nongïalam bad lyngba kitei ki kynrum kynram, kaba la pynlong ïa u ba un ngiah noh ban trei ne ban ïalam ïa ka Party.
Shuh shuh, u la ong ruh ba ha ka jinglong nongïalam jong u, u la lap bad shem ba ka Kong Macdalyne S. Mawlong, MDC Umsning bad kaba dei ka Kyrtong ka NPP na Nongpoh, ka dei ka briew kaba ym lah ban shimrai na lade, katei ka la pynartatien ïa utei u nongialam ka NPP, nalorkata ka dei ruh ka briew ka ym don jingsngewthuh jingmut ha ka rukom treikam.
“Ha ka 5 tarik mynta u Bnai, nga la ïoh ïa ka shithi wengkam shipor na u President ka NPP ha Ri Bhoi, uba la wengkam halor ka jingkynnoh ba nga leh ïa ki kam pyrshah Party, kumta nga ruh da ka jingkmen ha ka 7 tarik nga la phah ia ka shithi ïehnoh kam, ha kaba ki la don ruh ki rangbah bad ki longkmie kiba bat kam ha ki Block, ki la ïehnoh na ka jinglong kum u briew na ka Party NPP” pynpaw u Bah Plielad Tiewsoh.
U la pynpaw ruh, ba ka jingrung jong u sha ka NPP, ka dei lyngba ka jingsngew shngaiñ ïa u Dr. D.D Lapang, uba long ruh u Chief Adviser ka NPP bad ha ka sorkar, hynrei ka jingïehnoh jong u, ka dei namar ba um don ka jingshanniah ban trei bad ka Kong Macdalyne S. Mawlong, ha kaba u la pynpaw ruh ba ha ka jinglap jong u, ba ka Kyrtong jong ka NPP na Nongpoh kam pat dei kaba la shemphang ha ka kam nongïalam.
Haba pynkut ia ka kyrwoh, u Bah Plielad Tiewsoh, u la ong ba ïa kaba mynta kin sa pynbeit bad ki paralok, ba ïano kin kyrshan ha kane ka Ilekshon 2023, namar kum u briew uba la sngewtynnad ha ka kam Ilekshen bad ba ym lah hi ruh ban shu shong sngapjar, hynrei ha kane ka kynti kaba mynta kin sa kyrshan ïa u ne ka, kiba dei ki trai shnong ba shong ba sah ha Nongpoh Constituency, khnang ba ynda kin jop ruh ban suk ki paidbah haba ki leit ban kynduh ha kano kano ka por.
