SHILLONG:
U National General Secretary ka Trinamool Congress (TMC), u Abhishek Banerjee, ha ka 16 tarik Rymphang, u la ther tyngeh ïa ka sorkar Meghalaya Democratic Alliance (MDA) hapoh ka jingpyn ïaid jong ka seng National People’s Party (NPP) halor ka jingïai shet shukor jong ki ïa ki paidbah jong ka jylla Meghalaya bad ka jingpyn ngam ïa ka jylla shapoh ka jyrsieh.
Haba kren haka jingïalang paidbah ba la long ha Ampati, u Banerjee u la ong ba ha kane ka elekshon, ka jingthep ïa ki syntiew shijur jong ka TMC kam mut tang ban pynrem ïa ka NPP hynrei ban ai jingsneng ruh ïa ki.
U Banerjee u la ong, “Kane kam dei ka elekshon tang ban shu thep vote ne ban jied hynrei ban pynshitom ïa ka sorkar NPP ba bamsap kaba la lehkai ïa ka jingieid bad jingshaniah jong ki paidbah”.
Haba kren shaphang ka jingshah kynthoh ïa ka WE bad MYE Card jong ka TMC, u Banerjee u la ong ba ka jingshisha ka long ba da ki lak ngut ki paidbah kiba la pynrung kyrteng ha kane ka card ka long ka dak ba paw ïa ka jingud ban wad jingïarap bad ka jingbym lah jong kane ka sorkar ba mynta ban peit ïa ki jingeh jong ki paidbah ka jylla.
“U Conrad Sangma u kam baka Meghalaya ka don ïaka jingkyrduh kam ba duna tam hynrei phi dei ban peit ïa ka jingshisha kaba don hakhmat. Ka TMC kala pyllait ïaka MYE Card, palat 4 lak ngut ki samla ki la pynrung kyrteng ïalade. Kane ka pynskhem ïa ka jingshisha ba ka jingkyrduh kam ka jur bha hapoh ka jylla”, u la bynrap.
Da kaba kdew ba ki paidbah ka jylla mynta ki la shong la sah bad ki la im kum ki nongshong shnong ha kiwei pat ki jylla, u nongïalam ka TMC u la ther tyngeh ïa u Myntri Rangbah ka jylla bad u la ong ,“Ha kine ki san snem ba la dep, ka jylla Meghalaya ka la ïohi ïa u Myntri Rangbah ka jylla u bym shym la don ïaka jingshlur bad ïa u budlum ban kyrshan na bynta ki paidbah lajong bad ban ujor pyrshah ïa ki mat treikam ka BJP ba long pyrshah ïa ki paidbah. Dei tang ka seng TMC kaba phai pyrshah ïa ka seng BJP”.
Shuh shuh, u la ong ba tang hapoh shibnai bala thaw sorkar kata ha ka 2 tarik u bnai Ïaïong, ka TMC kan pynthikna ban pynpoi ïa ka pisa ba T 1000 sha baroh ki riewkynthei lyngba ka Direct Benefit Transfer kaba mut T 12000 ha ka shisnem.
“Phim donkam ban khrong hakhmat jongno jongno. Ngim dei ba leh isynei ïaphi da kaba ngi ai T 1000. Kane ka dei ka hok ka jong phi”, u la ong.
