MAWKYRWAT:
U MP ka Trinamool Congress (TMC) jong ka Rajya Sabha u Derek O’Brien ha ka 11 tarik Rymphang u la wan ïuh kjat ha Mawkyrwat ban ïalap elekshon ïa u Bah Sounder S. Cajee u ba dei u kyrtong ka TMC na Mawkyrwat konstitwensi.
U Derek haba kren ha kane ka sngi u la pynpaw ka jingïaroh ïa ka jylla Meghalaya ka dong ka thaiñ Mawkyrwat ba ka long kaba itynnad shisha. Ka thong kaba ha khmat eh jong ka TMC ka long ban wanrah ïa ka jingkylla naka bynta ki longkmie bad ki samla lyngba ka WE Card bad ka MYE Card ban ai jingïarap pisa T. 12 Sah manla u bnai kata hadien 100 sngi lada ka TMC kan wan ha ka bor ha kane ka elekshon MLA 2023. U la ong ruh ka daw ba u wan hangne ka long ban pynsngew ïa ki jingthmu jong ka seng TMC ba ka kwah ban kyntiew ïa ka pule puthi bad ruh ïa ka koit ka khiah ha kane ka jylla bad kumjuh ruh ha Mawkyrwat kumba ka TMC ha kiwei ki jylla ha ka jingshynshar jongka, ka ïarap ei lut ïa ki dawai da shin ïa ki nongpang, lyngba ka jingdon kawei ka Card jong ka longkmie haman la ka wei ka longing bad ruh na ka bynta ki khynnah skul kan ai jingïarap T. 10 lak ha ka sut kaba rit naka bynta ki jingpule jong ki.
U la ong ruh ba ka jylla Meghalaya katkum ka jingioh jingtip jong u, tang 50% na ka 100% ki la pyndonkam ha kaba iadei bad ki jingbam sngi jong ki khynnah skul ym kum ha kiwei ki jylla kiba pyndonkam 95% kane ka paw ba don ei ei sha lyndet.
U Derek u la ong ruh ba ma u kum u MP na ka TMC u la kren hapoh Rajya Sabha na ka bynta ka jingdonkam ka jaid bynriew Khasi ban ithuh noh ia ka ktien Khasi haka khyrnit kaba 8. “Hato kine ki MP jong ka jylla Meghalaya ki la kren halor kane ka bynta naka bynta ki mad jing dawa jong ka jaid bynriew Khasi”, u la buh jingkylli.
Ka Ri India ka long thik kum ka kper syntiew ba itynnad bha ba don bun ki jaid bynriew bad ruh ha ka niam ka rukom kaba dei ka ri shynshar paidbah kumta dei ban ker ban da bha ia ka bad ruh ban ïalong kawei.
Shuh shuh u la ong ruh ba balei kine ki seng saiñ pyrthei ha ka jylla Meghalaya ki ïa ïaid lang bad ka BJP ha kaba ka BJP kala leh donbor ïa ki paid Khristan bad ïa ki ïingmane Blei ha jylla Assam, Chattisgarh, Uttar Pradesh bad kiwei de ki Jylla hapoh ka Ri India. Lada ka TMC ka lah ban thaw Sorkar ha kane ka Jylla Meghalaya ka ai bor ban synshar hi da ki briew jong ka Meghalaya na ka bynta ki paidbah jong ka Meghalaya ym da kiwei ki ba nabar ka jylla Meghalaya, la ong u Derek O’Brien.
U la ong ba u Bah Sounder S.Cajee u dei u briew u ba biang bha. U la ong ruh ba haba u pule ïa ka kot ba la thoh shaphang u (L) Rowell Lyngdoh bad ka ïing ka sem jong u, ki long shisha ki riew khraw pyrkhat ïa ka imlang sahlang shibun ki kam ba kila leh naka bynta ka roi ka par bad ka jaidbynriew. “Pynlut ïa ka por 10 kynta haduh ban da dei ka por thep ïa ka vote ha ka 27 tarik ka 10 kynta jong phi bad ka shi vote ka jong phi na ka bynta ka 5 snem ïa u Bah Sounder S.Cajee ïa ka jingskhakri ïa kane ka Mawkyrwat Konstitwensi kan long ka jingkyrkhu bad ka jingkylla ïa ka jaid bynriew baroh kawei”, u la ong.
Ha kane ka sngi la ïoh ruh ki jingkren na u Bah Sounder kum u kyrtong, na u Samla Benjohnson Lyngdoh u President jong ka Youth Wing ha kaba kila pynlong ïa kane ka jingïalang ha Madan jong Nativity H.S Skul Mawkyrwat bad la ïoh ruh ban pynkup burom ïa ki samla kiba wanrah ïa ka nam ka burom naka bynta ki kam ïalehkai bapher bapher, bad ka jingpdiang burom ruh ïa ki katto katne ngut ki samla kiba la wan pynïasoh ïalade bad ka TMC ha kaba la sakhi lang da kiba bun ki paidbah naduh samla kynthei bad shynrang kiba la wan ban sngap ïa ka jingïalap elekshon ha kane ka sngi.
