SHILLONG:
Kum shi bynta ban nang pynkhlaiñ ïa ka seng bad ban pan ka jingkyrshan na ki paidbah, u nongïalam ba rangbah ka Trinamool Congress (TMC) ha Meghalaya, u Dr. Mukul Sangma ha ka 23 tarik Rymphang u la ïeng ha saw tylli ki rynsan ïalap paidbah ba la long ha rilum Garo, kata ha Chokpot hapoh South Garo Hills, ha Dalu, Gambegre, North bad South Tura hapoh West Garo Hills.
Ha ka jingkren sha ki paidbah ban pan ka jingkyrshan na ki, u Dr. Mukul ha ka jingïalang ba la long ha Chokpot u la ong, “Ki paidbah ki la sakhi da la ki jong ki khmat ïa ka jingbymbiang ka rukom treikam ka sorkar MDA hapoh ka jingïalam ka NPP ha kine ki san snem ba lah dep. To ngin nym ïa sngap jar hynrei ban kyrsiew thiah ïa ki paidbah kiba la sakhi ruh da lade ïa ki kam ba bamsap jong kane ka sorkar”.
Haba ai jingkren pat sha ki paidbah ha ka jingïalang kaba la long ha Dalu, u Dr. Mukul u la ther tyngeh ïa ka sorkar MDA halor ka jingthmu jong ka ban wanrah ïa ka casino bad ong ba ka sorkar MDA ba la ïalam da u Conrad Sangma ka la shet kylla ïa ki briew ka Meghalaya da ki kam ba long pyrshah ïa ki paidbah. U la ong ruh ba ki nongïalam niam haba ki tip ïa kane ki la leit ïakynduh ïa u Myntri Rangbah bad kyrpad ïa u ban ym wanrah ïa ka casino hapoh Meghalaya bad u la kular ïa ki ban weng noh ïa ka hynrei nadien jong ki u la ai lai tylli ki laisen halor kane. “Ngan ym ailad ba ka Meghalaya kan shah khot kyrteng kum ka ‘Sin City’, bad kumta ngin pynthikna ban weng noh ïa kane ka aiñ ïakhalai”.
U Dr. Mukul u la pynrem ruh ïa ka NPP kaba la ïalam ïa ka sorkar MDA halor ka jingshet shukor jong ka ïa ki samla bad ïa ka jingangnud jong ki. U la ong ruh ba ki samla ki la sah ha ka umdum bad jingduh jingkyrmen namar ka jingbymïoh ïa ki lad ki lynti ban ïohkam ha kine ki san snem.
“Hato ngan shu peitkai ba ka sorkar kan shet kylla ïa ki samla jong ngi? Em, ngan ai ïa ki ka jingkyrmen hapdeng ka jingshah kyntait noh. Ka MYE Card skhim jong ngi bad ka kular ban thaw 3 lak ki kam kan dei ka sienjam ba nyngkong eh ban weng ïa ka jingbymdonkam donjam kaba long ka khlam ha ka jylla jong ngi. Ka TMC kan thoh ïa ka lynnong bathymmai ha ka history jong ka saiñpyrthei ha Meghalaya, namar ngi don hapdeng ka lynti ban ai ka jingshakri ba bha tam ïa ki paidbah jong ngi”, la ong u Dr. Mukul.
Shuh shuh haba ai jingkren pat ha Gambegre, u Dr. Mukul u la khyrwit biang ïa ka sorkar ha ka jylla halor ka jingbymlah jong ka ban wanrah ïa ka synshar khadar kaba biang bad ong ba ka jingïakren mynta ha manla ki kyndong kynshrot jong ka jylla ka dei beit shaphang ka bamsap jong ka NPP. “Wat ha kane ka taïew ba lahdep, u myntri ka tnad kam pohiing jong ka sorkar pdeng u la ong ba ka Meghalaya ka dei ka jylla kaba bamsap tam ha ka India”.
“Ka Meghalaya kam dei kaba bamsap, hynrei dei kito ki nongïalam kiba don ha ka sorkar, kiba bat ïa u shabi duli ha kaba la buh ïa ka pisa paidbah na ka bynta ka roi ka par, kito kiba bam klop, kiba pynlut phut ïa ka pisa ïa ka pisa paidbah bad thep ha ki pla jong ki, ki dei kiba bamsap”, la ong shuh shuh u Dr. Mukul.
U Dr. Mukul u la khyrwit ruh ha kaba ïadei bad ka umbam umdih, da kaba ong ba ki la phah ïa ka kaiphod sha Delhi da kaba kam ba ki la lah ban pynpoi um sha baroh ki longiing ha ka jylla hapoh ka skhim Jal Jeevan Mission bad ki la ïoh ruh ïa ka khusnam halor kane. “Hynrei ha kaba shisha hi ka dei ba ka jylla ka dang don hapdeng ka jingeh haba ïadei bad ka um namar ka jingbym biang ka rukom treikam. Kane ka dei ka bamsap”.
