SHILLONG:
U National Vice President ka National People’s Party (NPP) u Bah Prestone Tynsong, u la ong ka jingong jong u Amit Shah ba lada ka BJP ka wan ha ka bor kin thung da ka Special task Force ka ban khlieh da u Nongbishar ba la shongthait jong ka Supreme Court ban tohkit ïa ka bam sap ha ka jylla, na ka liang u Bah Tynsong u la ong ba ka NPP ka pdiang ïa kano kano ka jingtohkit la ka dei da ka CBI ruh.
U la bynrap da kaba ong, “Man la u snem ka CAG report ka don bad ïa kane ki la wan rah ruh hapoh ka ïingdorbar thawaiñ ha kaba baroh ki dkhot ki ïoh ïa kane lyngba ka Assembly secretariat.”
“Ban shu ong ba ngin wan rah ïa kane ngin wan rah ïa katai, kam long kaba dei,” ong u Bah Prestone.
U La bynrap ruh da kaba ong, “Ba na ka liang ka Seng NPP lada ka jingkynnoh da kine ki nongïalam jong ki seng saiñ pyrthei ha ka por Ilekshon ka don ryngkat bad ki sakhi kiba biang, na ka liang ka seng ruh kan sa shim khia ïa kane hadien ka 2 tarik Lber hadien ba la dep ban thaw Sorkar.”
Haba ïa dei bad ka jingbym ailad ïa CBI da ka Sorkar jylla ban wan tohkit, na ka liang u Bah Prestone u la ong ngi khlem khang ïa ka jingwan tohkit da ka CBI, kaei kaba ka CBI ka hap ban leh ka dei ba ka hap ban ïoh jiingbit na ka Sorkar jylla bad ïa kane la leh naduh u snem 2010- 2011 kam dei da kane ka Sorkar.
U la bynrap da kaba ong ba lada ka don ka jingdon kam ban wan tohkit da ka CBI ha ka jylla kane ka tnat ka dei ban ïoh jingbit na ka Sorkar jylla, hynrei kam don katta ka ban ong ba la khang pyrshah.
Haba ïa dei bad ka jingong jong u Amit Shah ba ka Sorkar Meghalaya ka dei kaba bamsap tam , na ka liang u Bah Tynsong u la buh jingkylli ïa ki balei ki kren mynta balei kim kren naduh mynshuwa?, kila dei ban leh ïa katta na duh mynshuwa , la ka dei shi snem tam ne shisnem mynshuwa, “Ki byrngem ban weng jingkyrshan hynrei kim shym la leh ïa katta, kine ki dei ki mat kiba ki leh tang ban ïoh jingmyntoi na ka bynta ka ilekshon, ki paidbah ki tip kumno ban leh, bad baroh kan sa paw shai ha ka 2 trarik u Lber 2023,” u la ong.
Shuh shuh u Bah Prestone u la ther Tyngeh ïa ka UDP ïa ka jinglong arsap jong ka haba ïa dei bad ka MOU. Na ka liang u Bah Prestone u la ong man la ki rai ba ki shim ki la ïakren lang hapoh ka Kynhun Myntri, ym tang katta kila ïakren ruh ha ka jingïalang jong ki seng saiñ pyrthei baroh, ngi khot ïa ki District Council bad wat ïa ki sengbhalang, ngi la ïakren bad ki ngi la pynpaw ïa kaei kaba ki la ïakren ha shuwa ban ïasoi ïa ka MOU.
“Kaba lyngngoh ka long ba mynta ngim tip na ka ei ka daw ha ka Manifesto jong ka UDP ki ong ba ki kwah ban pyndam ïa ka MOU, kane ka dei ka kam arsap ka jong ki,” u la ong.
U la bynrap da kaba ong, “ Ki wei ki seng saiñ Pyrthei ruh kum ka TMC ki ong ba kin pyndam noh ïaka MOU, kane ka mut ba kim kwah ïa ka jingïapynbeit ïa kane ka mat kaba la sah da ki san phew snem tam, ki kwah ban long kumjuh kumba long mynshuwa.”
Shuh shuh u Bah Tynsong u la ong ba ki paidbah kim dei ban shaniah ïa kumne ki seng namar kim don ka jingkit khlieh haba ïa dei ba ka kam khappud.
