SHILLONG:
Ka National People’s Party (NPP), ha ka 22 tarik Jymmang ka la pynlong ïa ka National Committee Meeting ha Constitution Club of India kaba don ha Nongbah Delhi bad pynkup burom ruh ïa ki MLA ki ba shu shah jied shen na ka jylla Meghalaya, Nagaland bad Manipur.
Ha ba kren sha ki ladpathai khubor u Myntri Rangbah ka jylla Meghalaya u Conrad K Sangma u la ong, ba ka NPP ka dei ka wei na ki 6 tylli ki party ki ba la ïoh ïa ka jingithuh ha ka ri baroh kawei, bad ka dei ka wei ka seng na North East ka ba la ïoh ïa ka jingithuh kum ka party national .ka party ka la shim ïa ka jingkitkhlieh ban pynïaid shakhmat ïa ka jingïohi jngai jong u PA Sangma (Bamkwai ha Dwar u Blei ) u nongseng ïa ka NPP ba kan long kum ka wei na ki party national.
Mynta ka sngi ha ka jingïalang jong ka National Committee, ka National People’s Party (NPP) ka la shim ïa ka rai ban ïatreilang na ka bynta ban wanrah biang ka suk ka shngaiñ ha Jylla Manipur, kaba dang don hapdeng ka jingshongsyier hadien ka jingïakynad na ka jingïapher jaidbynriew.
U National President ka NPP, u Conrad K Sangma u la ong, “Halor ka jinglong jingman ha Jylla Manipur, ka party ka don ka jingsngewkhia ka ba jur, bad kum ka party, ngi rai ban ïatai bad baroh ki jaidbynriew ba kin ïatreilang na ka bynta ban wanrah ïa ka suk ka shngaiñ ha kane ka jylla”.
“Ka NPP kan pyrshang lut ïa baroh ki lad ki lynti ban ïarap bad pynthikna ba ka jylla Manipur kan ïoh biang ka shong suk shong shngaiñ bad ban ïarap ïa ki nongshong shnong ha ka jylla Manipur ha ki jingeh ba ki ïakynduh”, u la bynrap.
Ha kane ka jingïalang jong ka National Committee ka NPP la wan ban ïashim bynta da ki nongkitkam na jylla ki ba kynthup ka Assam, Arunachal Pradesh, Manipur, Mizoram, Chhattisgarh, Jharkhand, Karnataka, Gujarat bad Uttar Pradesh.
Ha kane ka jingïalang, na ka liang ki nongïalam ka NPP na ki jylla bapher bapher ki la aiti ïa ki kaiphod halor ka jingpynkhreh ïa ka elekshon Member of Parliament (MP) ka ban sa long shen bad kumjuh ruh ïa jingpynkhreh na ka bynta ka elekshon MLA ka ban sa long ha ka jylla Mizoram.
Na ka liang, u National Treasurer u James P.K Sangma, u la aiti ïa ka kaiphod halor ka mang tyngka ka party ba shisien shisnem jong u snem 2023-2023, kaba long katkum ka Article 23 (v) jong ka riti treikam ka party.
Mynta ka sngi u National President ka NPP, u la pynbna ruh ba la pynkiew kyrdan ïa u National Treasurer u James P.K Sangma sha u National General Secretary (Organisation) u ban khmih ïa ka jylla Arunchal Pradesh. Kumjuh la thung ruh ïa ka Kong Mazel Ampareen Lyngdoh kum ka nongïalam ban peit ïa ka jylla Mizoram, ïa u MLA na Manipur u M Rameshwar Singh bad MLA na Meghalaya Ian Botham K Sangma, u Nongïalam ka Party u Sushil Huidrom la thung kum ki co-incharge ka jylla Arunachal Pradesh bad Mizoram ban peit na ka bynta ka elekshon MP Lok Sabha bad elekshon MLA. Ïa u MLA ka Nagaland N Nyamnyei Konyak la thung kum u President ka NPP ha Nagaland katba ïa u President u Dr Andrew Ahoto la thung kum u National General Secretary.
