SHILLONG:
U Myntri Rangbah duh ka Ri, u Narendra Modi, ha ka 24 tarik Rymphang u la wan ha Shillong ban ïalap elekshon na ka bynta ki kyrtong ka seng Bharatiya Janata Party (BJP) ki ban ïakhun ha ka elekshon ka ban sa long ha ka 27 tarik mynta u bnai, ula ther tyngeh ïa ki seng saiñ pyrthei bapher bapher hapoh ka jylla bad u la ong, “Ki la pynlong ïa ka jylla Meghalaya kum ka mashin ATM, na ka bynta kaei? Na ka bynta ka jingmyntoi shimet jong ki.”
U la kyntu ruh ïa ki paidbah ban ym ngop ha ki jingshah pybiej bad u la ong, “Kum kane ka politik, khamtam ka politik ba hiar pateng (dynastic politics) ha ka jylla ha ki snem ba la dep ka la pynjot ïa ka jylla bad ïa ka phang shatei lam mihngi hi baroh kawei, hynrei nga sngew kmen ban ong ba ka jylla Meghalaya bad ka thaiñ hi baroh kawei ki don ryngkat mynta bad u syntiew Lotus.”
U Modi u la ai jingkren ha ka jingïalang paidbah kaba heh ha Khyndai Lad hadien ba u la shim bynta ha ka roadshow ha nongbah Shillong ha kane ka sngi.
Shuh shuh, u Modi u la ïathuh lypa ba u syntiew Lotus, uba dei ka shap jong ka seng BJP, un sa phuh ha ka jylla Meghalaya ha kane ka kynti.
Haba kren ha ka jingïalang paidbah kaba heh ha Khyndai Lad ha kane ka sngi, u Modi u la ong ba ka jingmut ne ka jingsngew bad ka jingïohi jong ki paidbah ka Meghalaya ka pynphalang ïa ka jingieid bad ka jingkyrshan kaba ki don na ka bynta ka seng bad ruh ïa ka jingang nud jong ki ïa ka jingkylla.
U la kyntu ïa ki paidbah ba kin vote ïa ka BJP khnang ba kan pynsuk ïa u ban ai ka jingshakri kaba biang ïa ki paidbah ka jylla lada thaw da ka sorkar BJP ha ka jylla Meghalaya.
“Lada thaw da ka sorkar BJP ha Meghalaya, kan long kaba kham suk ïa nga ban treikam kham bha bad kham jan shuh shuh bad ka jylla. Hato phin ai ka lad ïa nga ban shakri ïa phi?” u la kylli ïa ki paidbah.
