SHILLONG:
U National Secretary ka Bharatiya Janata Party (BJP), u Rituraj Sinha, ha ka 3 tarik Ïaïong u la ong ba ka seng kan ïit bad tohkit halor ka jingbym lah ka seng ban leh bha ha ka elekshon ba dang shu dep ha Meghalaya.
Haba kren sha ki lad pathai khubor ha Shillong, u Sinha u la ong ba ka jingkylli “balei” bad “kumno” ka seng thmu ban pynkhlaiñ shuh shuh ïa ka jingdon jong ka ha ka jylla Meghalaya, ka dei ka mat kaba dang hap ban ïit bniah.
U nongïalam ka BJP u la ong ruh ba ka seng ka pdiang ïa ka rai ki nongshong shnong ka Meghalaya, watla kata ka mut ba ka seng ka jop tang ar tylli ki shuki na ki 60 tylli kiba ka seng ka la pynïeng kyrtong.
Shuh shuh, u la ong ba ka jingkyrshan ba ka BJP ka la ïoh na ki nongshong shnong ka Meghalaya ka la kiew naduh ka snem 2018.
Haba jubab halor ka jingbym lah ka seng ban leh bha ha ka elekshon ba la dep watla ka seng ka la pynjur ka jingïalap elekshon, u Sinha u la ong, “Da kiba bun ki briew ki la pynïasoh ïalade bad ka BJP ha ka jylla bad ka jingkyrshan kaba ngi la ïoh ka long kaba phylla. Ka jingmih ki paidbah ha ki jingïalang jong ka BJP ka pyni ïa ka jingieid jong ki ïa ka seng. Kumta ka jingkyrshan ïa ka seng ka la kiew.”
Halor ka jingkynnoh u Myntri Rangbah duh ka Ri u narendra Modi ba ka Jylla Meghalaya ka dei ka jylla kaba bamsap tam, u Sinha u la ong ba ka elekshon ka la kut, bad ka la dei ka por ban pynthikna ïa kiei kiei kiba bha bad ïa ka sorkar kaba neh ha Meghalaya.
“Ka Meghalaya ka don shibun ki jingeh ha kaba ïadei bad ka roi ka par. Ka jingpynïaid ïa ka pisa ka tyngka (finance) ka jylla ka don hapdeng ka jingeh bad ka dei ïa ka sorkar pdeng bad ka sorkar jylla ban ïatrei lang ban weng ïa ki jingeh na ka bynta ki nongshong shnong ka Meghalaya, kiba long kongsan na ka bynta jong ngi,” la ong u Sinha.
Haba kylli la ka BJP ka thmu ban weng noh ïa u Bah Ernest Mawrie kum u President ka seng ha ka jylla hadien ka jingbym lah ban leh bha ha ka elekshon ba dang shu dep, u Sinha u la ong ba ïa mynta kam don kano kano ka jingïakren ha kaba ïadei bad kane ka mat.
“La ai bor ïa u National President ka BJP u JP Nadda ban shim rai halor kane bad ha ka por kaba biang lada kane ka mat ka mih, ïa kata ka rai yn sa shim,” u la ong.
