SHILLONG:
U Chairman jong ka State Planning Board ka jylla u Bah Metbah Lyngdoh u la ong ba ka Board ka don ka jingthmu ban synñiang na ka bynta ka bha ka miat jong ka jylla.
Haba kren hadien ka jingïalang kaba nyngkong jong ka State Plannig Board u Bah Metbah u la ong, “Ngim wan hangne tangba la thung ïa ngi kum ki Chairman lane ki dkhot jong kane ka Board hynrei ngi wan hangne ban synñiang lang na ka bynta ka bha ka miat jong ka jylla hi baroh kawei”.
“Nga sngewkmen ban pyntip ïaphi ba baroh arngut ki dkhot kiba long ki Co-Chairman jong kane ka Board ki la ong ba kim wan hangne tang na ka bynta ban kmen sngewbha lane ka jingsuk na ka sorkar hynrei ngi wan hangne ban ïoh synñiang lang bad ngin pynthikna ba ngin leh ha une u snem watla kadei ka snem thymmai”, la ong u Bah Metbah.
U Bah Metbah u la pyntip ruh ba kane ka jingïalang kaba nyngkong ka long tang ka jingpynithuh. U la ong ba ka sorkar kan shen kan sa shim ïa ki mat kiba donkam na ka bynta ban thung ïa kiwei ki dkhot jong ka Board.
Kumba long mynta ka Board ka don tang 3 ngut ki dkhot kynthup u Chairman bad 2 ngut ki Co-Chairman kiba la shah jied.
U Bah Metbah u la ïathuh ba ha ka Borad kaba la dep, ki dkhot kiban kynthup ïa ki Chief Secretary, Commissioner & Secretary bad kiwei kynthup ïa kiba la tbit na ki tnad bapher bapher jong ka sorkar jylla.
U Bah Metbah u la ong ba ka tnad planning ha ka jingïakren bad u myntir rangbah ka jylla bad u Chairman ka Board yn sa pynmih kumba 4-5 ngut ki dkhot jong kane ka tnad planning Board jong ka sorkar jylla.
U Bah Metbah u la ong ba hadien ba la biang lut nadong shadong kin sdang noh ban rah ïa ki mat ban ïakren ban ïa phylliew bad ban ai jingmut sha ka sorkar.
“Ngin sa sdang ïa kane ha ka taiew ban wan bab ngin sa bishar bniah bad ngin sa ïakynduh ïa u myntri rangbah ka jylla u Conrad K Sangma ban ïakren kumno ka jingtreikam jong kane ka Board bad kumno ban long kaba treikam bad ïa kine kiei kiei baroh ngin sa ïakren bad u”, la ong u Bah Metbah.
