SHILLONG:
U MLA ka Trinamool Congress (TMC) na West Bengal uba khmih ruh ïa ka jylla Meghalaya, u Manas Ranjan Bhunia, ha ka 23 tarik Rymphang u la pynrem ïa ka jingkynnoh u nongïalam ka Congress u Rahul Gandhi pyrshah ïa ka TMC.
Haba kren sha ki lad pathai khubor ha kane ka sngi, u Bhunia u la pynrem jur ïa ka jingkynnoh u Rahul Gandhi ba ka TMC ka dei ka Team B jong ka Bharatiya Janata Party (BJP) bad ba ka TMC ka ïarap ïa ka BJP ha ka jylla.
Ha kawei pat ka liang, u Bhunia u la ong, “Ka kam jong ka TMC, ha ka kyrteng jong ka All India Trinamool Congress (AITC), ka long ba ngin saphriang ha kylleng ka Ri India, ha ki jylla bapher bapher ban pyndep ïa ka rai jong ki paidbah ka Ri. Ha ka rukom synshar jong ka Ri India, ngi don ïa ka bynta kaba kongsan ha kaban pan ïa ka jingkyrshan na ki paidbah khnang ban pynneh ïa ka jingsynshar paidbah (democracy), ban burom ïa baroh ki jait niam, ban pynneh ïa ka jinglong laitluid ka Ri bad ban ïada ïa ka hok tynrai jong ki paidbah.”
U Bhunia u la bynrap ruh ba la lah ban pynshisha ba hapoh ka jingïalam ka Mamata Banerjee, ki mat bad ki kam kiba ka la ïakhun bad ka la pyntreikam ki long kiba la kyrshan da ki paidbah.
Haba kynthoh halor ka jingkynnoh u Rahul Gandhi pyrshah ïa ka TMC ba ka kyrshan ïa ka BJP, u Bhunia u la ong, “Ngi don hapdeng ka jingïakhun ha ka jylla Tripura ha kaba ka la don ka sorkar BJP bad ngi la ïakhun ruh ha ka jylla Goa ha kaba ka la don ka sorkar BJP. Ngi dang ïakhun mynta ha ka jylla Meghalaya ha kaba la synshar ka sorkar ba la kyrshan da ka BJP. Te kumno ngi kyrshan ïa ka BJP?”
U la bynrap ruh ba ka TMC ka la pynliem ïa ka BJP ha ka elekshon sha ïingdorbar thawaiñ ha ka jylla West Bengal ha ka snem 2021 bad ka la lah ban wan biang ha ka bor ha ka sien kaba lai.
Shuh shuh u Bhunia u la ïaroh ïa u Bah Charles Pyngrope bad u Mukul Sangma kiba la don ïa ka jingtip bad ka jingshemphang ha ka saiñ pyrthei bad u la pynpaw ruh ïa ka jingkyrmen ba ki paidbah ka jylla Meghalaya kin ai ka jingkyrshan ïa ki ha kane ka elekshon kaban sa long ha ka 27 tarik Rymphang.
U Bhunia u la ong ruh ba ki paidbah ka jylla ki donkam ïa ka jingkylla. “Ka Meghalaya TMC kan pyndep ha kane ka elekshon ïa ka jingdawa bad ka jingangnud jong ki paidbah ka jylla halor ka jingdonkam ïa ka jingkylla,” u la bynrap.
“Nalor ka koit ka khiah, ka jingmut jingpyrkhat kaba bha, ngi kwah ruh ïa ka roi ka par kaba bha bad ba ka jylla Meghalaya, kaba riewspah ha ka kolshor, ki riti ki dustur, bad kiwei kiwei, kan roi kan par bad ka TMC ka ïeng na ka bynta kata. Hapoh ka jingïalam ka Mamata Banerjee, u Abhishek Banerjee, u Bah Charles Pyngrope bad u Mukul Sangma, ka TMC kan ïai bteng ha kane ka sur ban pynurlong ïa ka jingangnud ki nongshong shnong ka Meghalaya,” la ong u Bhunia.
