SHILLONG:
U Kyrtong ka Regional Democratic Alliance u Bah Robertjune Kharjahrin haba kren halor ki kyrtong ki ban aireng ïa ka MP election na ka Shillong Parliamentary Seat u la kyntu ïa ki paidbah ba kim dei ban pynlehnohei ïa ka vote jong ki hynrei ki dei ban ai ïa ka vote sha u kyrtong ka RDA u ban lah ban rah ïa ki mat jingdawa ka jylla sha Parliament.
Halor u kyrtong ka VPP, u Bah Ricky Syngkong, u Bah Robertjune u la ong, “nga dei u briew uba burom ïa baroh ki sengriewlum kynthup ïa ka VPP hynrei nga sngew ba halor ka MP Election ka RDA ka kham don ka jingkyrmen ban jop namar ngi bun ki MLA bad ki MDC bad ngam kheiñ troiñ ïa baroh ki kyrtong hynrei lada ngi bishar ïa ka jingbun ki MLA ki MDC bad ka Vote Share ha ka election ba dang shu dep ngi don ka jingkyrmen kaba khraw.”
U la ong, “nga kyntu ïa baroh ki nongkyrshan jong ka VPP ban ym pynlehnohei ïa ki Vote na ka bynta u kyrtong ka VPP namar ba kane kan long tang ka jingpynpra ïa ka vote bad ka RDA ka don ïa ka jingkyrmen ban ïoh jingjop bad nga kular ba ki mat kiba na ka liang ka VPP ka kwah ban rah ha Parliament ngan rah ma nga.”
U la bynrap, “ka VPP kam dei ban pynpait ïa ka vote hapdeng ki sengriewlum bad ka donkam ban long tylli tang ha ka RDA khnang ba kan don ka jingjop na ka bynta kawei ka sengriewlum.”
Halor u Kyrtong ka Congress u Bah Vincent H Pala, u Bah Robertjune u la kynnoh ba ka jingbym patlah jong ka jylla ban ïoh ïa ka jingpyntreikam ïa ka Innerline Permit (ILP) ha ka jylla ka dei na ka jingbym shim khia u MP ka Jylla.
“Ka jingbym pat lah jong ka jylla ban ïoh ïa ka ILP ka lah ban long namar u MP jong ngi u Bah Vincent H Pala u ïeng pyrshah halor ka jingpyntreikam ïa ka ILP ha ka jylla, Phi lah ban ïohi ba u Bah Pala man ka por u la kren pyrshah halor ka jingpyntreikam ïa ka ILP ha ka jylla kumta ka long ka ba donkam ïa ki nongshong shnong ha ka jylla ba kin jied da u briew u ban lah ban kren halor kane ka mat.”
Halor ka kyrtong NPP ka Kong Ampareen Lyngdoh, u Bah Robertjune u la ong ba u paidbah un ym pynjop ïa ka kyrtong ka NPP namar ba ki sngewthuh ba kan sa don ka jingpynlut phut ïa ka pisa u paidbah.
U la ong ba, “halor ka jingmih ïakhun ka myntri ka Sorkar ïa ka election MP ngim lah ban kynthoh eiei namar ka riti shynshar ka shah hynrei na ka bynta u paidbah kan long tang ka jinglut phut ka pisa u paidbah.”
“Lada ka Kong Ampareen kan jop ïa ka MP election, katno ka pisa ba na ka liang ka sorkar jylla kan pynlut ïa ka pisa ban pynlong biang ïa ka election shiteng samoi namar kane kan dei ka pisa u paidbah, kumta ngam tharai ba ki paidbah kin jied ïa ka kong Ampareen,” u la bynrap.
