SHILLONG:
U Myntri Rangbah ka jylla u Conrad K Sangma, u la ïathuh ba ka jingïakren halor ka jingpynïasoh jong ki ar ngut ki MLA ka People’s Democratic Front (PDF) sha ka National People’s Party ka dang don ha ka lynti jong ka jingïakren.
“Kumba ka long mynta halor kane ka jingïakren ka dang ïaid shakhmat, bad kim pat la shim rai kumno kumno ruh, ngin ap bad peit ynda la biang ka por”, la ong u Myntri Rangbah sha ki lad pathai khubor.
Lah ban kdew hangne, ha ka taïew ba la dep ka la mih kynsan ka khubor balah ban rung NPP noh ki ar ngut ki MLA ka PDF, u Bah Banteidor Lyngdoh u MLA ka Mawkynrew Konstitwensibad u Bah Gavin Mylliem u MLA ka Sohra Konstitwensi.
Hynrei na ka liang u President ka People’s Democratic Front (PDF) u ba long ruh u MLA ka Sohra Constituency, u Bah Gavin Mylliem, u la kubur ba ka don ka jingtyrwa na ka liang ka National People’s Party (NPP) ban pynïasoh noh sha kane ka party hynrei ka PDF kam pat shim rai eiei.
“Na ka liang ka NPP, hooid ka la don kum kata ka jingtyrwa hynrei ïa kita kita baroh ka por kan sa batai, bad ka NPP ka la kyrpad ïa ngi ki MLA ka PDF ban pynïasoh noh sha ka NPP hynrei ka por kan sa batai, namar ba ngim pat shim rai eiei ba ngin rung ne em”, la ong u Bah Gavin Mylliem.
Kumjuh u Working President ka PDF u ba long ruh u MLA ka Mawkynrew Konstitwensiu Bah Banteidor Lyngdoh, u khlem kyntait ïa kane ka khubor, da ka ba ong ba ka party kan sa ïakren ïa kane ka kam ynda la dei ka por.
“Ka la don ka jingïakren halor ka jingpynïasoh noh sha ka NPP, hynrei ngin sa shim ïa ka rai ha ka por ba biang bad ngin sa pyntip sha baroh, hynrei kumba long mynta hi ym lah ban kren eiei halor kane ka bynta namar ba ngam kwah ban rai marwei”, u la ong.
