SHILLONG:
U President ka United Democratic Party (UDP) u Bah Metbah Lyngdoh, ha ka 6 tarik Lber u la ong ba kam dei ban kynnoh ba ka UDP ka leh drama ha ka jingpyrshang ban thaw ïa ka sorkar ki seng riewlum hadien bym lah ban pynurlong.
Haba kren ha kane ka sngi, u Bah Metbah u la ong, “Ngam don hangne kum u President ka parti ban leh drama ban pynbiej ïa ki paidbah bad ngan ym leh lano lano ruh”.
Kane ka jingkren u President ka UDP ka dei hadien ba u President ka Voice of the People’s Party (VPP) u Bah Ardent M Basaiawmoit u la kynnoh ba ka jingpyrshang thaw ïa ka sorkar ban ïalam ka seng riewlum ka dei tang ka drama jong ka UDP ban pyni sha ki paidbah.
Lah ban kdew ba ka jingpyrshang ban thaw ïa ka sorkar ban ïalam ki seng riewlum khlem ka NPP, BJP ka la pulom noh hadien ba ar ngut ki MLA ka HSPDP kila phet rieh na jaka ban ïakren ïapynbeit da kaba leit ai jingkyrshan noh ïa ka NPP. Kane ka la pyllong ïa ki seng riewlum ban ïakynduh jingeh namar bym biang ka jingdon ki MLA bad ha ka 5 tarik Lber, ka UDP bad ka PDF kila rai ban leit lang noh syndon ban kyrshan ïa ka NPP ha kane ka kynti ruh hadien ba kila ïatreilang ha kine ki san snem ba la dep.
U Bah Metbah u la ong ba haduh ka 5 tarik Lber, ki ar ngut ki MLA ka HSPDP kim shym la wan phai satia wat hadien ba u President jong ka, u la pynthikna ba kin wan bad dei na kane ka daw ba ka jingthmu kam shym la urlong satia.
“Ha ka jingshisha ki paidbah ki kwah ba ngin ïalam ïa ka sorkar hynrei haba peit ïa ka jingmih ka result baroh ki seng riewlum ki jop tang 19 ngut”, la ong u Bah Metbah.
U la ong ba shi taiew shwa ban thep vote, kumba 24 tylli ki konsitwensi ba ka UDP ka don jingkyrmen ban poi sha ka thong hynrei ka lah ban jop tang 11 ngut.
Ka jingthaw sorkar lang bad ka NPP ka dei namar ba ka donkam ïa ka sorkar kaba skhem ban kyntiew ïa ka roi ka par ha ka jylla.
