SHILLONG:
U Symbud Myntri Rangbah ka jylla u Bah Sniawbhalang Dhar u la ong ba ka kan nym don ka jingktah ei ei ka jingïadei paralok hapdeng ka United Democratic Party (UDP) bad ka National People’s Party (NPP) hapoh ka Meghalaya Democratic Alliance (MDA-2).
Ïa kane u la kren hadien ba la mih ka khubor hamsaïa ba kan sa don ka jingkylla ha ka Sorkar MDA-2 hadien ka elekshon ha Sohiong
Haba kren sha ki lad pathai khubor u Bah Sniawbhalang u la ong ba ki paralok kiba ïatreilang ha ka Sorkar MDA-2 ki ïadon ïa ka jingïadei ba ïajan bha bad ma u hi um iohi satia ban don ka jingkylla ha ka Sorkar hadien ka elekshon Sohiong. U la ong ba ka elekshon kan ïaid ka elekshon bad kam don kano kano ka jingktah ei ei bad ka sorkar MDA-2 ruh ka dang ïai khlaiñ bha. “Ka elekshon kan ïaid ka elekshon bad kaei kaba jia ha ka por elekshon kan kut tang ha ka elekshon”.
Haba kylli hato ka seng UDP kan shah weng noh na ka sorkar synroplang, u Bah Sniawbhalang u la ong, “Kane kam long kaba shisha namar ka UDP kumba long naduh kaba sdang ka jingïatreilang kan ïai don beit ryngkat bad ka sorkar MDA-2 bad ka jingïadei paralok bad ka seng UDP ruh ka long kaba khlaiñ”.
Haba kylli halor ki arngut ki MLA ka People’s Democratic Front (PDF) kiba la wan ban pynïasoh ïalade bad ka party NPP, la ka sorkar MDA-2 kan ai bhah shuki lang na ka bynta jong ki, u Bah Sniawbhalang u la ong, “Ngi pynpaw ka jingsngewkmen ba kine ki arngut ki MLA ka PDF kiba la wan ban pynïasoh ïalade bad ka party NPP hynrei ha kaba ïadei bad ka bhah shuki ïa mynta ym pat rai ei ei. Kaei kaba ngi sngewnguh ka long ba kine ki MLA ki la wan ban ïadon lang bad ka party NPP bad kumba ka long ka jingkhang jong ka NPP kan ïai plie kat kiba kwah ban ïadonlang”.
Haba kylli halor ka jingiohi jong u ïa ka elekshon, u Bah Sniawbha ula ong “To ngin ap ïa ka sngi niew vote”. U la ong ruh, “Ka NPP kan kam ba ka NPP kan jop bad ka UDP ruh kan kam ba kan jop”.
Lah ban kdew ba Ka jingïathep vote ha ka elekshon MLA ha Sohiong la dep ban pyllong ha ka 11 tarik u Jymmang, 2023 bad ka jingniew ïa ki vote kan long ha ka 13 tarik mynta u bnai.
