SHILLONG:
U kyrtong ka Trinamool Congress (TMC) na South Tura konstitwensi, u Richard M Marak, ha ka 13 tarik Rymphang u la ther ïa u Conrad Sangma halor ka jingbymlah jong u ban ïalam ïa ka sorkar bad ka jingpynsaphriang ïa ki khubor lamler.
Haba kynthoh ïa u Myntri Rangbah ka jylla halor ka jingjer kyrteng jong u ïa ki kam ba seisoh ba ka sorkar MDA hapoh ka jingïalam ka NPP ka la leh ha kine ki san snem, une u kyrteng ka TMC u la buh jingkylli, “Kumno u Myntri Rangbah u sngew sarong ban ong ba lyngba ka Jal Jeevan Mission skhim, ki la lah ban ai um sha ki 2.5 lak tylli ki longiing na ki 4000 tylli ha u snem 2018?”
U la ong ruh ba kaba shisha hi ka dei ba ka sorkar NPP ka don hapdeng ka jingkhynwin hapdeng ka jingïaleh halor ka jingkam bymdei ha kaba ïadei bad ka jingpyntreikam ïa ka JJM. U la ai nuksa ruh kum ïa ka shnong Imamsdrop hapoh Rongjeng, ha kaba ki nongshong shnong ym tang ba ki la shah tuh noh ïa ka umbam umdih jong ki hynrei u Sordar jong kane ka shnong u la kynnoh ruh ïa ka PHE halor ka jingpynbiej jong ka ïa ki ban ngeit ba lah pyndep ïa kane ka projek. “Kiba bun ki longiing hapoh South Tura ruh ki duna ïa ka umbam umdih”, la ong u Richard Marak.
U Richard u la khyrwit ruh ïa u Myntri Rangbah da kaba ong ba u la jler halor ka jingong ba u pynthikna ïa ka shongsuk shongsaiñ ha ka jylla da kaba kynnoh ba ka jingjia ba dang shen ha Phulbari ha ka jingïapynibor hapdeng ki nongkyrshan ka NPP bad TMC ha kaba u MDC ka NPP u la don kti lang bad kdew ruh ïa ka jingshah thombor ki nonghikai kiba la ïakhih da kaba jai jai bad ong ba kane ka pyni shai ïa ka rong ba shisha jong u Conrad Sangma.
Une u kyrtong ka TMC u la kdew ruh kumno ba u Conrad Sangma kum u Myntri Rangbah, u la pulom ha ka jingtrei kam jong u ban pynkiew ïa ka rukom im ki briew. U la ong ba haba u Myntri Rangbah u la ong ba u la pynsngewsarong ïa ka Meghalaya ha kiba bun ki liang, u la kynmaw kumno ba u la pynsngewsarong ïa ki samla kane ka jylla da kaba u khlem lah ban ai kam bad pynsniew dur ïa ka lawei jong ki. U la kdew ruh shaphang ka jingbymlah jong u Myntri Rangbah ban pynkiew ha kaba ïadei bad ka rukom ai jingsumar ïa ki briew bad ruh ïa ka jingbym lah ka sorkar MDA ban pynkiew ïa ka pule puthi ha ka jylla.
U Richard u la ong ruh ba kane ka sorkar kam dei kaba treikam halor ka jingdonkam ki paidbah, hynrei ka sorkar kaba treikam bha tang ha kaba ïadei bad ka kam bamsap bad ka kam thok.
