MAIRANG:
U MLA ka Mawthadraishan Konstitwensi u Bah Brolding Nongsiej ula thep kyrteng ha ka 3 tarik Rymphang kum u kyrtong na ka seng United Democratic Party (UDP) Mawthadraishan hakhmat u Returning Officer jong ka Eastern West Khasi Hills District u Bah CP Mawkon ban ïakhun biang ha kane ka elekshon 2023.
Ha kane ka sngi la wan ban synran lang ïa u Bah Brol da ki bahaïing hasem, ki nongïalam ba ha khmat duh lem bad ki nongkyrshan jong ka seng.
Haba kren sha ki lad pathai khubor u Bah Brol ula ong ba ka daw kaba pynlong ïa u ban ïakhun biang ïa kane ka Elekshon ka long ban pyndep ïa ki kam kiba dang sah kiba dang hap ban pyndep, bad ka thong jong u bad ka seng ka dang bun bad ruh ka dang donkam ban wanrah ïa ka College ïa ka CHC ha kane Mawthadraishan Block kaba long ka Block kaba dang thymmai bad ruh ban bteng biang ïa ka coaching centre naka bynta ban ai ka jingnang jingstad sha ki khun samla hapoh Kynshi.
“Ha kine ki san snem ba la dep nga la wanrah bun ki kam pynroi ha kaba ïadei bad ki surok bad kum ka Konstitwensi ka ba dang sah dien nga la nang trei shitom bad bun kiba nga la lah ban pyndep hynrei ki don sa tang khyndiat ki ba ngam pat lah pyndep bad kane ka dei ka thong ba lada nga jop biang sa shisien ngan pyndep lut baroh,” la ong u Bah Brol.
Shuh shuh u Bah Brolding ula pynpaw ruh ïa ka jingsngew shngaiñ ba ha u snem 2023 ka jingïakhun elekshon ka kham suk ban ïa nujor bad u snem 2013 & 2018 namar ba ha une u snem 2023 ki don bun bah ki nongkyrshan kiba na kiwei ki seng kiba kynthup ïa u MDC barim, u Kyrtong MDC barim bad ruh u kyrtong MLA barim kila wan ban ai ka jingkyrshan na ka bynta jong u bad ula ong ruh ba ka jingïapait ïapra noh jong ka seng riewlum HSPDP ka pynlong ïa u ba un sngewkhem ba un jop ha kane ka kynti bad ka long ka sien kaba nyngkong ba baroh ki riew rangbah ki la wan pynïasoh noh sha ka seng UDP kaba dei ruh ka seng riewlum kaba heh.
