SHILLONG:
U Myntri sorkar bad u nongïalam ka United Democratic Party (UDP) u Bah Paul Lyngdoh, ha ka 5 tarik Jylliew u la ai ka jingïaroh ïa ki jaitbynriew Garo halor ka jingsngewthuh jong ki ïa ka saiñpyrthei ha ka jylla ban ha ba ïa nujor bad ki jaitbynriew Khasi.
“Ki jaitbynriew Garo ki la kham rangbah ka jingmut jingpyrkhat ha ba ïa dei bad ka saiñpyrthei haba ïa nujor bad ki jaitbynriew Khasi”, la ong u bah Paul Lyngdoh sha ki ladpathai khubor.
“Ki jaitbynriew Khasi, ki ju mlien tang ban hylla ha ka ba ïadei bad ki ba bun ki mat hynrei lada phi peit ïa ki jaitbynriew Garo kim ju leh kumta hynrei ki leh da ka jingstad bad ka jingpynïaid ka ba long rangbah”, u la ong.
“Ha ka kam saiñpyrthei, nga la ïohi ba bun na ngi, ngi dang long khyllung khynnah ha ka jingmut jingpyrkhat katba ki jaitbynriew Garo ki la ju pynpaw ba ki la long rangbah ban sngewthuh ïa kane ka bynta”.
Lada phi peit halor ka jingdawa Myntri Rangbah da u Khasi, u nongïalam ka UDP u la kylli hato phi la ju ïohsngew ïa kano kano ka sur na Garo hill ha ka ba ïadei bad kane ka bynta “Em, hynrei ki la pynpaw ïa kane ha ka election ka ba dang shu dep, da ka ba ai ïa ka National People’s Party (NPP) – 18 MLA na ki 24 tylli ki Constituency, ban pynthikna ba u Myntri Rangbah un dei ban long beit na ka jaitbynriew jong ki”.
Ha ba kren halor ka Reservation Policy, u Bah Paul u la ong, “Halor kane ka mat lada ngi hylla bad pynmih shibun ka nia, kan khring ym tang ïa ka high court hynrei wat ïa ka supreme court ruh. Mynta phi lah ban ïohi ba bun na ki ritpaid (minority group) ki la mih shakhmat ban dawa ïa la ka jong ka bhah, ka ba lah ban wanrah ïa ka jingeh ban pynbeit ïa kane ka mat”.
Halor ka jingkynnoh ba u sngap jar halor ka mat reservation, u Bah Lyngdoh u la ong , “Kum u nongïalam, kam long ka ba stad ban pynpaw ïa ki buit bad ki lynti ba kumno ngan pynurlong ïa kane ka jingdawa, kiwei ki shu kren, hynrei nga trei.”
“Hato kan long ka ba dei ba u khynnah pule class 8 lane 9 un wan ban batai halor ka jingthaw ïa ka policy, lada la long kumta nga ruh nga la dei ban pyndep tang ïa ka jingpule tang haduh class 8 bad batai ïa kane, bad kum kane ka jingpynshlur ïa ki samla pule da ki katto katne ki kynhun ka long ka jingbakla”, u la bynrap.
“Kiwei ki pyndonkam da ka jabieng hynrei ngi ju pyndonkam da ka dohnud hynrei ym ha ka lynti ka ba dei ngi pyntreikam da ka jingsngew kaba bakla ban synshar” u la ong haba u ther ïa ka Voice of the People Party (VPP).
