SHILLONG:
U president ka seng Voice of the People Party (VPP) u Bah Ardent Miller Basaiawmoit ha ka 15 tarik Rymphang u la ong ba ki jingphla jong u pulit ophisar ba shah set phatok u Bah GK Iangrai pyrshah ïa ki bor ba halor jong ka tnad ka lah ban dei tang shi thmit na u tduh jong u lum thah.
Na ka liang u Bah Ardent Basaiawmoit u la ong ha baroh ki tnad treikam jong ka sorkar ki don beit ki jingbymbiang bad u la bynrap ba kane kan pyn pei phang ïa ki paidbah ka jylla ban pdiang ïa ka jingkwah ka seng ban pynkhuid ïa baroh ki rukom treikam lyngba ka saiñ hima sima kaba khuid ba suba.
“Kan nym don da kiwei pat ki seng saiñ pyrthei ki ba lah ban ai ka jingshakri kaba bha lait na ka Voice of the People Party,” la ong u nongïalam ka seng VPP
U Bah Basaiawmoit u la ong ka dei tang ka seng kaba thymmai kum ka seng VPP kaba lah ban pynbeit ïa baroh ki jingduna ha ki ba bun ki tnad treikam jong ka sorkar, kaba la kylla long kum ki matïong ha ka durkhmat jong ka jylla.
“Ka Voice of the People Party ka dei kawei ka seng riewlum ba thymmai hapoh ka jylla. Ki paidbah kim dei ban shah ïalam bakla. Kiwei ki lah ban bujli tang ka jaiñphong hynrei u briew te u sah u juh. Hynrei mangi ka VPP, ngi dei ka seng thymmai, ngi don ïa ki durkhmat ba thymmai bad ki rukom pyrkhat jong ngi ruh ki thymmai ryngkat ki nongrim ki ba skhem,” la ong u Bah Basaiawmoit.
U nongïalam ka seng VPP u la ong ruh ba ki paidbah ki dei ban sngewthuh ba kiwei kiwei ki seng saiñ pyrthei kim lah ban leh ei ei haba ïadei bad u pulit ophisar bad ka jingdawa ïa ka aiñ halor ki jingkynnoh jong u kin long bym lar kam.
“Ngi ong ïa ki paidbah ban ailad ïa ngi ban pynpaw pyrthei lut ïa baroh ki kam jakhlia ym tang ha ki tnad pulit hynrei ha kiwei pat ki tnad ruh kumjuh,” u la ong.
Haba jubab ba lada ka seng VPP kan phah ïa ka kynhun shimet ban tohkit halor ki jing ujor ba la ai da u Bah Iangrai, u Bah Basaiawmoit u la ong ba ka seng ka ngeit bad shaniah ha ka jing bishar jong ka aiñ bad ka saiñ pyrthei kaba khuid bad kumta u kwah ba ka tnad wad jingtip kata ka investigating agencies kam dei ban shah shiliang bad kano kano ka bor hapoh ka jylla.
U la ong ba katkum ki jingkren jong u Iangrai sha ki lad pathai khubor, u la ong ba um shym la don bynta ha kino kino ki kam sniew.
“Lada ngi kwah ban ïoh ïa ka jing bishar kaba hok kano kano ka kynhun wad jingtip ka dei ban long ka kynhun shimet,” la ong u Bah Basaiawmoit.
