SHILLONG:
U National President ka National People’s Party (NPP), u Conrad K Sangma ha ka 6 tarik Lber u la pynpaw ïa ka jingjop jong ka sorkar Meghalaya Democratic Alliance (MDA) hapoh ka jingïalam ka NPP bad u la ong ba yn shim ïa kijuh ki lad ban pynthikna ka jingkiew ha baroh ki tnad ba kynthup naduh ka jingwanrah ïa ki lad ïoh kam ïoh jam, kam jngohkai pyrthei bad ka rep ka riang kaba yn kham peit kyrpang da ka sorkar ha kine ki san snem ban wan.
“La ka dei ka bynta jong ka Information Technology (IT), ngi la la lah ban pyllait ïa ka call centre ba lah ban pdiang haduh 3000 ngut ha kine ki san snem ba la dep bad ka Business Process Outsourcing (BPO) IT park. Nga khmih lynti ba ha kine ki san snem ban wan ngin sa pynrung palat 20 hajar tylli ki seat, ngi la dep ban pyllait palat 5hajar tylli ki seat bad kadei ka jingthmu bad ka jingkwah jong nga ba ha kaba kut jong ka samoi jong nga, ngi dei ban don la kumno kumno 20 haduh 25 hajar tylli ki seat ha ki BPO hapoh ka jylla jong ngi”, la ong u Sangma katba u dang kdew ïa ki jingthmu jong kane ka sorkar thymmai hapoh ki san snem ban wan.
“Haba kren shaphang ka kam jngohkai, u la ong ba kane kadei kawei ka bynta ba ka sorkar ka lah ban trei ban thaw shibun tylli ki lad ki lynti na bynta ka imlang sahlang, u la ong ruh ba ha ki san snem ban wan, yn kyntiew ïa kine ki bynta khnang ban wanrah ka ïoh ka kot hapoh ka jylla”.
Shuh shuh, u Sangma u la bynrap ba ka jingpynshong dor ïa ka rep ka riang, ban kyntiew ïa ka koit ka khiah bad ka pule puthi kan ïai bteng ryngkat ka jingbei tyngka ba kham jur ha kine ki san snem ban wan.
U Conrad Sangma u la ong ruh ba ki jingtei hapoh ka jylla ba kynthup naduh ki tnad PHE, tnad bording, ki surok ter ter ki long ki bynta ba ka sorkar kan khmih kyrpang ban kyntiew ïa ka roi ka par. “Ngi la leh shibun ki kam ha kine ki san snem haba ïadei bad ki surok, ka jingpynpoi um, nga khmih lynti ba ngin lah ban pyntuid ïa ki kam ha ki san snem ban wan ha kaba ngin sa lah ban pynthikna ba baroh ki longïing kin sa ïoh ïa ka um (tapwater connection) bad yn pynthikna ba baroh ki shnong kin sa ïoh ïa ka surok ban ïaid kali bad baroh ki long ïing kin don ïa ka bording”, u Sangma u la bynrap.
