SHILLONG:
U Vice President ka AITC Meghalaya uba long ruh u MLA u Zenith M Sangma u la kynnoh ba ha man ki jylla ba ka Bharatiya Janata Party (BJP) ka ïoh ban bat ïa u lakam shynshar ki paid Khristan ki ju mad ïa ka jingshah thombor kaba shyrkhei.
Ka Meghalaya Trinamool Congress ha ka 28 tarik Nohprah, ka la pynpaw ïa ka jingpyrshah halor ka jingbthah ba la pynmih da ka sorkar Assam ba la shynshar da ka BJP halor ka jingpan jingkheiñ ïa ka jingtei ïa ki jingïaseng ba thymmai da ki niam Khristan.
Haba kren sha ki lad pathai khubor, u Zenith u la ong , “ka BJP ka don ïa ka jingthmu ban wanrah ïa ka jingbym shong suk shnong shngaiñ ha ki paid Khristan ha baroh kawei ka Ri. Ngi pynrem ïa ka buit leh politik jong ka BJP kaba thmu ban phiah ïa ki niam Khistan ha Assam bad ngi pynrem jur ruh halor ka jingshah thombor ki ïingmane bad ka jingthombor ïa ki nongïalam niam kaba ju jia haman ki jylla ba la shynshar da ka Sorkar BJP”.
“Ka Meghalaya TMC kan ym lah ban leh matlah ïa kine ki jingleh arsap jong ka sorkar BJP, kumta ngin ïakhun pyrshah ïa kane haduh ban da kut bad ngim lah ban shu peit kai ïa ka Ri baieid jong ngi ba kan shah pynpharia lyngkhot lyngkhai, bad ka jinglaitluid ban bud ïa la ka jingngeit kan shah pynjot, ngi dei ban ïakhun lang pyrshah ïa kane ka jingthmu sniew jong ka BJP ha baroh ki jylla jong ka Ri”, u la bynrap.
U Zenith u la ong ruh , “mynta ka sngi, ngi la ïohi ïa ka jingshah pynjulor ki ïingmane ha baroh ki jylla ki ba shynshar ka BJP, ngim pat ju ïoh sngew ba kum kine ki jingshah thombor kin jia ha ki jylla ba don ha ki thaiñ shatei lammihngi, hynrei naduh ba ka sorkar BJP ka la wan ha ka bor ha Assam, ki jingshah thombor ïa ki Kristan ki la sdang jia, ka BJP ka don ka jingthmu ban pynlong ïa ka mat ba buhrieh jong ka”.
“Dang shen ki ïingmane ki la shah pynjulor bad ki nongïalam niam bad ki Pastor ki la shah thombor ha Maharashtra, Karnataka kane ka pawshai ba ki kynhun Kristan ki shah lehbein ha ka BJP”, u la bynrap.
Lah ban kdew hangne ba katkum ka jingbthah ba la pynmih da ka Special Branch, Assam Police ka ba la pan ïa ka jingkheiñ halor ka jingdon ki ïingmane ha kine ki khyndiat snem, ka jingdon ki ïingmane, ka jingkylla Khristan ki nongshong shnong ha kine ki 6 bnai , bad halor ki briew ki ba donkti ban pynkylla niam haduh u Nohprah 22.
