SHILLONG:
U President ka Meghalaya Pradesh Congress Committee (MPCC) u bah Vincent H Pala u la ong ba ka jingjied jong ka Congress ïa ki briew ban long kum ki kyrtong ka long katkum ka jingbishar bniah ïa ki ym ba ki jied ïa ki briew ki ba ïa jan bad ki nongïalam ka Congress.
Haba kren bad ki lad pathai khubor u President ka MPCC u bah Vincent u la ong ba ka Congress ka kwah ba kan don ka jingkhuid ka jingsuba ban jied ïa ki kyrtong, kumta kan ym ai tiket ïa ki briew ki ba ïajan bad ki nongïalam hynrei ka party ka la thaw da ki Committee ba kin leit ban bishar bha halor ki briew kiba wan ban tyrwa ïalade kum ki kyrtong na ka party Congress.
U bah Pala u la ïathuh ba mynta ka kynti ka Congress kan wanrah ïa ki kyrtong kiba thymmai, 10 ngut ki kyrtong ki dei ki MLA barim ki MDC hynrei bun hi ki dei ki kyrtong kiba thymmai.
“Ka Congress ka la jied ruh ïa ki briew kiba la biang ka kyrdan pule kynthup ïa ki 6 ngut ki Engineer ban long kum ki kyrtong, ha ka thup kyrteng ba la mynjur da ka Pradesh Election Committee (PEC)”u la ong.
U la bynrap shuh shuh ba ka Congress mynta ka kynti kan wanrah ïa ki briew ki bym don kano kano ka jingshah kynthoh, bad ka kyrmen ruh ba ki nongshong shnong ha kajylla kin ai ka jingkyrshan ba pura ïa ka Congress ba kan wan ha ka bor ha u snem 2023.
