SHILLONG:
U kyrtong ka National People’s Party (NPP) ba dei ruh u MLA barim ka Sohïong Konstitwensi, u Bah Samlin Malngiang, ha ka 10 tarik Jymmang u la thep ïa ka vote jong u ha kane ka elekshon jied nongmihkhmat sha ka Ïing dorbar thawaiñ ka jylla.
Haba pynpaw ïa ka jingsngew thikna ban ïoh bat biang ïa ka shuki MLA na Sohïong, u Bah Samlin u khmih lynti ban ïoh jingjop bad ba un tam la kumno kumno palat 100 vote. U la pynthikna ruh ba un kyntiew ïa ka Konstitwensi ha baroh ki liang kum ka shongsuk shongsaiñ, kamai kajih, ka ïohkam ïohjam, ka rep ka riang, ka koit ka khiah bad ka pule puthi.
“Kine kim dei ki jingkular kai. Nga la leh bun kiei kiei na bynta ka konstitwensi bad haba nga jam shakhmat, ngan sa trei na bynta ban kyntiew ïa ki shnong ki thaw, ha ka shongsuk shongsaiñ bad ngan shimkhia khatmtam ïa ka rep ka riang,” u la ong.
Haba jubab halor ki jingkynnoh ba ka duna ki kam pynroi ha ka konstitwensi, u Bah Samlin u la ong, “Ki liang pyrshah kin kynnoh beit. Kata ka dei ka kam jong ki. Ki ong ba duna ki kam pynroi hynrei ki paidbah ki tip kham bha. Ki la ïohi ïa ka kam jong nga bad ki nongthep vote ki tip ba nga dei u briew ba trei hok bad ba biang ban shah jied biang kum u MLA”.
Halor ka jingkylli ba ïa pyrshah ka NPP bad ka UDP ba ka don ka jingïalehkai paralok, u kyrtong ka NPP u la ong, “Haoid, ngi ïatreilang ha ka sorkar MDA II hynrei ka elekshon te ka dei beit ka elekshon”.
Na ka liang u Bah Samlin u la ai ksai ruh halor ka jingkylla ha ka jinglong jingman jong ka saiñ pyrthei hapoh ka jylla. “Ngi khmih lynti ïa ka jingkylla ha ka rukom treikam jong ka sorkar. Ngi don kham bun ki MLA mynta, lada nga jop ngin sa tam kumba 35 ngut baroh, ryngkat ka jingkyrshan ki lok ba synrop lang kata ka BJP,HSPDP bad ki MLA shimet, khlem ka UDP, u la bynrap.
Ha ka sorkar synrop MDA II, ka NPP ka la don 28 ngut ki MLA, ka UDP ka don 12 ngut ki MLA , mar ar ngut ki MLA na ka BJP bad HSPDP. Khlem ka UDP, ka sorkar synrop jong ka NPP ka ïa biang 34 ngut ki MLA, lait noh u MLA ka Sohïong.
Ka jingailad ban thep vote ha kane ka Konstitwensi kan kut haduh 4 baje janmiet bad ka jingñiew vote kan long ha ka 13 tarik Jymmang ha Shillong.
