SHILLONG:
U President ka People’s Democratic Front (PDF) uba dei ruh u MLA ka Sohra konstitwensi, u bah Gavin M Mylliem, u la ong ba ki nongïalam kiba pynïasoh sha ki seng saiñ pyrthei ki dei ban long kiba khlaiñ ha ka nongrim kaba ki ïeng.
U Bah Mylliem u la ong ruh ba um kyntait ïa ka jingshisha ba man ki seng saiñ pyrthei ki pyrshang ban khring ïa ki kyrtong kiba don jingkyrmen ban jop na kiwei ki seng saiñ hima.
“Hynrei ngi dei ban sngewthuh ba kum ki nongïalam, ngi dei ban don ïa ka nongrim haba ngi pynïasoh sha ka seng. Ka lah ban long ha shuwa ban pynïasoh, ngi dei ban don ka nongrim namar ki paidbah kin tip ïa ka nongrim kaba ka seng PDF ka ïeng,” la ong u President ka PDF.
U la ïathuh ruh ba ka PDF haduh mynta kam pat ïoh khubor ei ei na ki arngut ki MLA jong ka, kiba ki khubor hamsaïa ki ïathuh ba kine ki arngut ki MLA kynthup ïa u Bah Hamletson Dohling (Mylliem) bad u Bah Jason Mawlong (Umsning) ba kin mih noh na ka PDF.
Haba ïadei bad kane u Bah Mylliem u la ong, “Ngi tip ba ki zonal committees ha kito ki artylli ki konstitwensi ki dang treikam bad ngi khlem ïoh kano kano ka jingpynshisha na ki. Ngim pat lah ban ïaid shakhmat ban pynbna kyrtong ban mih bujli ïa ki.”
U President ka PDF u la ong ban pynïasoh sha kiwei pat ki seng saiñ pyrthei khlem kino kino ki daw, kam long ka lynti kaba dei. “Kaba kongsan eh ka dei ba lada ki kwah ban ïakhun na kiwei ki seng, ka dei ban long katkum ka nongrim kaba ki don.”
U Bah Mylliem u la ong ba na ka liang ka seng PDF, ha kine ki bnai ba lah dep ki lah lum ïa ka jingïalang bad ki nongïalam ka zonal committees jong kine ki artylli ki konstitwensi.
U la ong ruh ba ka seng PDF ka dei kaba dang thymmai bad ‘ba kan kiew kynsan kynsan kam long ka lynti kaba dei’.
U la ong ba ka dei ka kamram jong ki nongmihkhmat ban ïaineh bad ki nongïalam kiba biang ban ïa kaba bun ngut.
“Ngi kum ka seng ngim duh jingkyrmen, wat la ngi ïakynduh shibun ki jingeh bad ngin ïaitrei shitom ban kyntiew ïa ka PDF kaba dang lung,” ong u Bah Mylliem.
U la ong ruh ba ka PDF ka don ka lad ban jop ïa ka Mawphlang konstitwensi hadien ba u MLA ba mynta uba dei na ka seng UDP, u la rai ban ym ïakhun shuh ïa ka elekshon ban wan.
Ka PDF ka la rai ban pynïeng ïa u general secretary ka seng, u Bah Auspicious Lyngdoh Mawphlang na ka bynta ka elekshon ha u snem 2023.
“Kum ka seng ngim duh jingkyrmen bad ngi don ka jingkyrmen ban leh ïa kaba bha ha kane ka elekshon ban wan ka ban long ha u snem 2023,” u la bynrap.
